گوجرخان میں مدرسے کے طالبعلم سے زیادتی کرنے والا معلم گرفتار

 راولپنڈی: اسلام پورہ جبر کے مدرسے میں 14 سالہ لڑکے سے زیادتی کرنے والے مدرس کو گرفتار کرلیا گیا۔

ایکسپریس نیوز کے مطابق راولپنڈی کی تحصیل گوجرخان میں واقع مدرسے میں 14 سالہ لڑکے سے زیادتی کرنے والے درندہ صفت معلم کو گرفتار کرلیا گیاہے، ملزم مولوی عبد الشکور مظفر گڑھ کا رہائشی ہے اور اسلام پورہ جبر کے مدرسے میں پڑھاتا ہے۔

پولیس کے مطابق بچے سے زیادتی کی خبر جنگل میں آگ کی طرح پھیل گئی اور اہل علاقہ نے ملزم کی درگت بناکر اس کے بال مونڈھ دیئے، واقعہ کی اطلاع ملتے ہی گوجرخان پولیس نے فوری کاروائی کرتے ہوئے ملزم کو گرفتار کرلیا۔

پولیس حکام نے بتایا کہ متاثرہ لڑکے کے والد کی درخواست پر مقدمہ درج کرلیا گیا ہے، درخواست میں بتایا گیا ہے کہ 14 سالہ بچہ مقامی مدرسے میں زیر تعلیم تھا، رات جب سب بچے سوگئے تو ملزم نے بچے کو زبردستی زیادتی کا نشانہ بنایا اور کسی کو بتانے کی صورت میں دھمکیاں دیں۔ پولیس نے مقدمہ درج کرکے تفتیش شروع کردی۔

دوسری جانب سی پی او راولپنڈی احسن یونس کا کہنا ہے کہ بچوں سے زیادتی ناقابل برداشت ہے، ملزم کو سخت سزا دلوانے کے لئے تمام قانونی تقاضے پورے کئے جائیں۔