اپوزیشن وباء میں کارکنوں کو ذاتی مفاد کیلئے بطورایندھن استعمال کررہی ہے، پی ٹی آئی رہنما

 اسلام آباد: کورونا کے دوران اپوزیشن کے جلسے جلوس پر حکومتی شخصیات نے تشویش کا اظہار کرتے ہوئے کہا ہے کہ اپوزیشن وباء میں کارکنوں کو ذاتی مفاد کے لیے بطور ایندھن استعمال کررہی ہے، اپوزیشن اپنے مفاد کے لیے عوام کی زندگیوں سے مت کھیلے۔

وفاقی وزیراطلاعات شبلی فراز نے سماجی رابطے کی ویب سائٹ پر ٹویٹ میں لکھا کہ اپوزیشن رہنما گھر کے پرآسائش ماحول میں قرنطینہ ہیں جب کہ کارکنوں کو ذاتی مفاد کے لیے ایندھن کے طور پر استعمال کیا جارہا ہے، اپوزیشن آخر کب تک معصوم عوام کی جانوں سے یوں ہی کھیلتی رہے گی۔

اپوزیشن رہنماخودتو گھر کےپرآسائش ماحول میں قرنطینہ ہیں جبکہ کارکنان اورعوام کو ذاتی سیاسی مفاد کےتحفظ کیلئے ایندھن کے طور پراستعمال کیاجارہا ہے۔اپوزیشن آخر کب تک معصوم عوام کی جانوں سے یوں ہی کھیلتی رہے گی؟کرونا سے اپنوں کو کھونے والے باشعورعوام انھیں کبھی معاف نہیں کریں گے۔

— Senator Shibli Faraz (@shiblifaraz) December 6, 2020

سینیٹرفیصل جاوید نے بھی ٹویٹر کا محاذ سنبھالا اور کہا اسمبلی سے استعفوں کی بات ہو رہی ہے، یہ استعفےنہیں، لطیفے ہیں، اول تو استعفے دیں گے نہیں اور اگر دے بھی دیے، سو بسم اللہ دے دیں، جن نشستوں پر استعفے دیں گے وہاں پہ ضمنی الیکشن ہوگا اور پی ٹی آئی بھاری اکثریت حاصل کر لے گی۔

اسمبلی سےاستعفوں کی بات ہو رہی ہے-یہ استعفےنہیں – لطیفے ہیں-اول تو دیں گے نہیں اور اگر دے بھی دی دیے-سو بسم اللہ دے دیں استعفے-جن نشستوں پر استعفےدیں گے وہاں پہ ضمنی الیکشن ہوگا اور PTI بھاری اکثریت حاصل کر لے گی-این آر او کے لیے جتنے پاپڑ بیلنے ہیں بیل لیں – ڈیل نہیں ملے گی

— Faisal Javed Khan (@FaisalJavedKhan) December 6, 2020

معاون خصوصی شہبازگل نے بھی ٹویٹ میں لکھا کہ جب سے وزیراعظم نے کہا کہ کسی کو جلسے کے لیے روکا نہیں جائے گا لیکن قانون توڑنے والوں پر کارروائی ہوگی، تب سے مریم نواز حواس باختہ ہوگئی ہیں، ۔مریم نواز کو پتہ ہے لوگ ان کو مسترد کر چکے ہیں، 13 دسمبر کو لاہور ان کو بتائے گا کہ شہر انکی جاگیر نہیں، لوگ کرپٹ چوروں کو مسترد کر چکےہیں۔

جب سے وزیراعظم نے انٹرویو میں یہ کہا کہ کسی کو جلسے کے لئیے روکا نہیں جائے گا لیکن قانون توڑنے والوں پر کاروائی ہوگی تب سے مجرمہ مریم حواس باختہ ہو گئی ہے۔مجرمہ کو پتہ ہے لوگ انُکو ریجیکٹ کر چکے -13 دسمبر لاہور انکو بتائے گا کہ لاہور انکی جاگیر نہیں-لوگ کرپٹ چوروں کو مسترد کر چکے

— Dr. Shahbaz GiLL (@SHABAZGIL) December 6, 2020

دوسری جانب وزیراعلیٰ پنجاب عثمان بزدارنے بھی خبردار کیا کہ لاہور میں وباء کی صورتحال تشویشناک ہے، اپوزیشن اجتماعات کے ذریعے عوام کی زندگیوں سے نہ کھیلے۔

حکومتی شخصیات نے واضح کیا کہ اپوزیشن اپنے مفاد کے لیے عوام کی زندگیاں خطرے میں مت ڈالے، خلاف ورزی کرنے والوں کے خلاف سخت کارروائی بھی ہوگی۔