ٹیکس رعایتیں واپس لینے کا منصوبہ31دسمبر تک تیار کر لیں گےچیئرمین ایف بی آر

اسلام آباد: وفاقی وزیر خزانہ سینیٹر اسحاق ڈار ایف بی آر ہیڈ آفس میں اجلاس کی صدارت کررہے ہیں اجلاس میں فیڈرل بورڈ آف ریونیو کی کارکردگی اور ٹیکس رعایتوں کے لیے جاری ایس آر او کا جائزہ لیا گیا ۔ فوٹو : این این آئی

---

چیئرمین فیڈرل بورڈ آف ریونیو(ایف بی آر) طارق باجوہ نے کہا ہے کہ ایس آر اوز کے ذریعے انکم ٹیکس، کسٹمز اور سیلز ٹیکس میں دی گئی رعایتوں سے متعلق پلان کو 31 دسمبر 2013 تک حتمی شکل دے دی جائے گی۔

یہ بات انہوں نے گزشتہ روز وفاقی وزیر خزانہ اسحاق ڈار کی زیر صدارت اجلاس میں بتائی۔ اجلاس میں خزانہ اور تجارت کے وفاقی سیکریٹریز اور مشیر خزانہ کے علاوہ وزارت خزانہ، ایف بی آر اور نیشنل ٹیرف کمیشن کے سینئر افسران نے بھی شرکت کی۔ اجلاس میں وفاقی وزیر خزانہ نے فیڈرل بورڈ آف ریونیو کی کارکردگی کا جائزہ لیا۔



اس موقع پر بریفنگ دیتے ہوئے چیئرمین ایف بی آر طارق باجوہ نے وفاقی وزیر خزانہ کو رواں مالی سال کے لیے ریونیو کے بجٹ اہداف کے حصول کے لیے کی جانے والی کوششوں سے آگاہ کیا اور وفاقی وزیر کو ایس آر اوز کی واپسی سے متعلق ایف بی آر کے پلان کے بارے میں بھی بریفنگ دی گئی جبکہ اجلاس میں انکم ٹیکس، کسٹمز اور سیلز ٹیکس میں دی گئی رعایتوں سے متعلق جاری کیے گئے ایس آر اوز کا بھی جائزہ لیا گیا۔ چیئرمین ایف بی آر نے بتایا کہ پلان کو 31 دسمبر 2013 تک حتمی شکل دیدی جائے گی۔