پشتون تحفظ موومنٹ سے تعلق رکھنے والے رکن قومی اسمبلی علی وزیر کو پشاور سے گرفتار کرنے کے بعد کراچی منتقل کردیا گیا۔
ایکسپریس نیوز کے مطابق کراچی سہراب گوٹھ انویسٹی گیشن پولیس نے پشاور سے گرفتار ہونے والے رکن قومی اسمبلی علی وزیر کو پشاور سے کراچی منتقل کردیا۔
تفتیشی پولیس کا کہنا تھا کہ ملزم علی وزیر کو خصوصی پرواز کے ذریعے کراچی ائیر پورٹ لے کر آئے اور وہاں سے تفتیش کے لیے نامعلوم مقام پر منتقل کردیا ہے، ملزم علی وزیر اور اس کے ساتھیوں کے خلاف سہراب گوٹھ تھانے میں مقدمہ الزام نمبر 876/20 درج ہے۔
اس مقدمے میں پولیس علی وزیر کے ساتھی مقامی رہنما نور اللہ ترین سمیت دیگر افراد کو گرفتار کرچکی ہے، سہراب گوٹھ پولیس کے ہاتھوں گرفتار ہونے والوں میں پی ٹی ایم کے کارکنان بھی شامل ہیں جو اپنے رہنما علی وزیر کی گرفتاری پر سپر ہائی وے پر احتجاج کر رہے تھے۔
