ہار کا ڈر ٹیموں نے ’تلواریں‘ میان میں رکھ دیں ابو ظبی ٹیسٹ ڈرا

ابوظبی ٹیسٹ : آخری دن حفیظ سوئپ شاٹ کے ذریعے چوکا لگارہے ہیں، انھوں نے دوسری اننگز میں ناقابل شکست 80 رنز کی عمدہ اننگز کھیلی ۔ فوٹو: اے ایف پی

---

پاکستان اور سری لنکا دونوں نے ہارکے ڈر سے پہلا ٹیسٹ ڈرا کرا دیا۔

302 کا ٹارگٹ دیکھ کر میزبان ٹیم کے پسینے چھوٹنے لگے، 52 اوورز میں 2 وکٹ پر 158 رنز بناکر جان چھڑائی،15اوورز قبل ہی باہمی رضامندی سے دونوں ٹیموں نے 'تلواریں' میان میں رکھ دیں، کوئی سائیڈ بھی مقابلے پر آمادہ دکھائی نہیں دی،محمد حفیظ 80 رنز پر ناٹ آئوٹ پویلین واپس گئے، احمد شہزاد نے پہلی ٹیسٹ ففٹی اسکور کی، اس سے قبل سری لنکا نے دوسری اننگز 5 وکٹ 480 رنز پر ڈیکلیئرڈ کی، آئی لینڈرز کی سست روی سے بیٹنگ دیکھ کر ہی اندازہ ہوگیا کہ وہ نتیجے سے زیادہ خود کو محفوظ بنانے میں دلچسپی رکھتے ہیں، کپتان انجیلو میتھیوز 157 اور پرسنا جے وردنے 63 رنز پر ناقابل شکست رہے۔

تفصیلات کے مطابق پاکستان اور سری لنکا کے درمیان ابوظبی کے شیخ زید اسٹیڈیم پر کھیلا جانے والا پہلا ٹیسٹ ڈرا ہوگیا جس سے سیریز دونوں سائیڈز کیلیے بدستور اوپن ہے، تین میچز کی سیریز کا دوسرا ٹیسٹ بدھ سے دبئی میں شروع ہوگا۔ نتیجہ برآمد نہ ہونے کے باوجود سری لنکا کو اس مقابلے میں اخلاقی فتح حاصل ہوئی، پہلی اننگز میں 179 رنز کے خسارے سے دوچار ہونے کی وجہ سے شکست کا خطرہ اس کے سرپر منڈلا رہا تھا مگر میتھیوزکیریئر بیسٹ 157 رنز ناٹ آئوٹ جڑ کر ٹیم کو مشکلات سے باحفاظت نکال لائے۔ پاکستان کو اس میچ میں فتح کیلیے 302 رنز کا ہدف ملا مگر آغاز سے ہی محسوس ہوگیا کہ ٹیم اسے حاصل کرنے میں دلچسپی نہیں رکھتی، پاکستان کا ٹیسٹ کرکٹ میں سب سے بہترین فاتحانہ تعاقب 314 رنز ہے جو اس نے آسٹریلیا کے خلاف 1994 میں کراچی میں حاصل کیا تھا۔



دوسری اننگزکے آغاز میں ہی میزبان کو خرم منظور کی وکٹ کا نقصان اٹھانا پڑا جو صرف 8 رنز پر سورنگا لکمل کی گیند پر وکٹ کیپر پرسنا جے وردنے کے ہاتھوں کیچ ہوگئے، دوسرے اوپنر احمد شہزاد اور محمد حفیظ نے انتہائی اطمینان سے کھیلتے ہوئے دوسری وکٹ کیلیے 101 رنز کی شراکت کی،احمد 55 رنز پر رنگانا ہیراتھ کی گیند پر ایل بی ڈبلیو قرار پائے۔ اسکور جب 52 اوورز میں 158 رنز پر پہنچا تو دونوں کپتانوں کی باہمی رضامندی سے امپائرز نے میچ کو ڈرا قرار دیتے ہوئے ختم کرنے کا اعلان کردیا، حفیظ اس وقت80 جبکہ یونس خان 20 رنز پر کھیل رہے تھے، دونوں حریف فیلڈرز سے ہاتھ ملاتے ہوئے خوشی خوشی پویلین واپس لوٹ آئے۔

اس سے قبل سری لنکا نے دوسری اننگز 480 رنز 5 وکٹ پر ڈیکلیئرڈ کی، صبح کے سیشن میں ڈیڑھ گھنٹے تک سست بیٹنگ کو دیکھ کر ہی ظاہر ہورہا تھا کہ وہ تین ٹیسٹ میچز کی سیریز میں برتری کے بجائے دفاع کو ترجیح دے رہے ہیں، میتھیوز اور پرسنا جے وردنے کے درمیان چھٹی وکٹ کیلیے 156 رنز کی ناقابل شکست شراکت ہوئی، میتھیوز نے 457 منٹ تک بیٹنگ کرتے ہوئے 343 گیندوں کا سامنا کیا، انھوں نے 16 چوکے اور ایک چھکا رسید کیا۔ پرسنا 63 رنز پر ناٹ آئوٹ رہے،انھوں نے 6 چوکے اور ایک چھکا لگایا۔ جنید خان نے 36 اوورز میں 93 رنز دے کر تین وکٹیں لیں، بلاول بھٹی نے 2 وکٹوں کیلیے 146 رنز دیے، سعید اجمل نے 49 اوورز میں 115 رنز دیے پھر بھی خالی ہاتھ رہے۔