کاغذات نامزدگی کی جانچ مکمل آج سے اپیلیں دائر ہونگی

500 سے زائد نامزدگیاں مسترد کردی گئیں،پیر سے نامزدگیوں کی منظوری یا مسترد ہونے کیخلاف اپیلیں دائر ہونگی،ضلع شرقی میں 219 کاغذات مسترد۔ فوٹو: فائل

---

KARACHI: کراچی کے 6 اضلاع میں امیدواروں کے کاغذات نامزدگی کی جانچ پڑتال (اسکروٹنی) کا سلسلہ آخری روز اتوار کوبھی جاری رہا۔

شہر میںمجموعی طور پر11ہزار سے زائد کاغذات نامزدگی جمع کرائے گئے،10ہزار سے زائد کاغذات نامزدگی منظور اور 500 سے زائد مسترد ہوئے، متحدہ قومی موومنٹ کے ڈاکٹر فاروق ستار، وسیم اختر، خوش بخت شجاعت، جماعت اسلامی کے حافظ نعیم الرحمن، مسلم پرویز، پیپلزپارٹی کے سعید غنی، نجمی عالم اور دیگر کے کاغذات نامزدگی منظور کرلیے گئے، پیر سے کاغٖذات نامزدگیوں کی منظوری یا مسترد ہونے کے خلاف اپیلیں دائر کی جائیں گی، تفصیلات کے مطابق کراچی کے 6 اضلاع میں متحدہ قومی موومنٹ، پیپلزپارٹی،جماعت اسلامی،تحریک انصاف، جمعیت علمائے پاکستان، مسلم لیگ ن، مسلم لیگ فنکشنل، جمعیت علمائے اسلام اور دیگر سیاسی و مذہبی جماعتوں کے ہزاروں امیدواروں نے کاغذات نامزدگی جمع کرائے تھے انکی جانچ پڑتال (اسکروٹنی) کا سلسلہ اتوار کو مکمل ہوگیا، ایم کیوایم کے رہنما ڈاکٹر فاروق ستار، وسیم اختر، سید شاکر علی، امین الحق، آصف حسنین، پیپلزپارٹی کے نجمی عالم، سعید غنی، وقار مہدی، جماعت اسلامی کے حافظ نعیم الرحمن، مسلم پرویز اور دیگر رہنمائوں کے کاغذات نامزدگی منظور کرلیے گئے۔



الیکشن کمیشن کے ذرائع کے مطابق ضلع وسطی میں 2763 کاغذات نامزدگی جمع کرائے گئے جن میں سے 2640 منظور اور 123 مسترد کردیے گئے،ضلع شرقی میں 2409 کاغذات نامزدگی جمع کرائے گئے جن میں سے 2190 منظور اور 219 مسترد کردیے گئے،ضلع غربی میں 2220 کاغذات نامزدگی جمع کرائے جن میں سے 2116 منظور اور 104 مسترد کردیے گئے،ضلع جنوبی میں 1802 کاغذات نامزدگی جمع کرائے گئے جن میں سے1743منظور اور 59 مسترد کردیے گئے، ضلع کورنگی میں 1972 کاغذات نامزدگی جمع کرائے گئے جن میں سے1951منظور اور21 مسترد کیے گئے، ضلع ملیر سے رات گئے تک رپورٹ موصول نہیں ہوئی۔