ڈونلڈ ٹرمپ کا نیا سوشل میڈیا پلیٹ فارم لانچ کرنے کا فیصلہ

ٹوئٹر نے سابق صدر کا اکاؤنٹ مستقل طور پر بند کردیا تھا، فوٹو : فائل

---

سابق صدر ڈونلڈ ٹرمپ سوشل میڈیا پر جلد ہی واپس آرہے ہیں اور اس بار یہ واپسی ان کے اپنے سوشل میڈیا پلیٹ فارم پر ہوگی۔

امریکی نشریاتی ادارے کے مطابق صدارتی الیکشن میں ناکامی اور ٹوئٹر پر مستقل پابندی کے بعد سابق صدر ٹرمپ نے سوشل میڈیا میں انٹری کے لیے نئے پلیٹ فارم کے استعمال کا فیصلہ کیا ہے جو ان کا ذاتی پلیٹ فارم ہوگا۔

ٹرمپ کے مشیر اور ترجمان جیسن ملر نے فاکس نیوز کو بتایا کہ سابق صدر دو سے تین ماہ کے دوران سوشل میڈیا پر واپس آجائیں گے تاہم یہ واپسی ان کے اپنے پلیٹ فارم پر ہوگی جس میں لاکھوں نئے صارفین بھی شامل ہوسکیں گے۔

.@JasonMillerinDC said President Trump will be "returning to social media in two or three months" with "his own platform" that will "completely redefine the game" and attract "tens of millions" of new users. #MediaBuzz

— #MediaBuzz (@MediaBuzzFNC) March 21, 2021

امریکی صدارتی الیکشن میں ناکامی کے بعد ٹرمپ کے حامیوں نے کانگریس کی عمارت پر دھاوا بول دیا تھا اور توڑ پھوڑ کی تھی جس کے دوران 5 افراد ہلاک ہوگئے تھے۔ یہ حملہ حامیوں نے مبینہ طور پر سابق صدر کے اکسانے پر کیا تھا۔

اس واقعے کے بعد سماجی رابطے کی ویب سائٹس فیس بک، ٹوئٹر اور یوٹیوب نے سابق صدر کے اکاؤنٹس عارضی طور پر بند کردیئے تھے جب کہ بعد میں ٹوئٹر نے اکاؤنٹ مستقل ہی بند کردیا تھا۔