پریذیڈنٹ ون ڈے کپ پی ٹی وی نے حبیب بینک کو اپ سیٹ شکست دی

، فہد الحق نے 33 گیندوں پر40 رنزناٹ آئوٹ بناکر ٹیم کو 41 ویں اوور میں فتح دلادی۔ فوٹو: فائل

---

HYDERABAD: پریذیڈنٹ ون ڈے کپ میں پی ٹی وی نے حبیب بینک کو 7وکٹ سے اپ سیٹ شکست دے دی۔

سعید انور جونیئر کی سنچری کے باوجود کے آرایل فتح سے محروم رہی، سوئی ناردرن گیس نے دلچسپ مقابلہ 3رنز سے جیت لیا، فواد عالم اور عمر وحید کی ففٹیزکی بدولت نیشنل بینک نے زرعی ترقیاتی بینک کیخلاف 88رنز سے کامیابی حاصل کی، عبدالرزاق کی نصف سنچری رائیگاں گئی، یوبی ایل نے پی آئی اے کو 7وکٹ سے قابو کیا۔ تفصیلات کے مطابق پی ٹی وی کے خلاف حبیب بینک کی ٹیم 40 اوورز میں 165 رنز تک محدود رہی، فاسٹ بولر زوہیب احمداور لیگ اسپنر سمیع اللہ نے 3،3 وکٹیں لیں، حسن رضا 43رنز کے ساتھ ٹاپ اسکورر بنے، فاتح ٹیم نے ہدف تین وکٹ پر حاصل کرلیا، محمد نعیم(49) اور محمد عدنان(34) نے 74 کا آغاز فراہم کیا لیکن اس کے بعد تین وکٹیں گرگئیں، نواز احمد31رنز بناکرپویلین واپس ہوئے، فہد الحق نے 33 گیندوں پر40 رنزناٹ آئوٹ بناکر ٹیم کو 41 ویں اوور میں فتح دلادی۔



یاد رہے گذشتہ دنوں پریذیڈنٹ ٹرافی میں حبیب بینک نے پی ٹی وی کو اننگز سے شکست دی تھی۔کے آر ایل کیخلاف سوئی ناردرن گیس کو دلچسپ مقابلے میں 3رنز سے فتح ملی، سعید انور کی ناقابل شکست سنچری رائیگاں گئی، انھوں نے 8 چوکوں اور 4چھکوں کی مدد سے 103 رنز اسکورکیے، علی خان کے 54رنز بھی ٹیم کے کام نہ آسکے، اسد علی اور عمران علی نے 3،3 پلیئرز کو پویلین چلتاکیا، فتح کیلیے 200 رنز کا تعاقب کرنے والی ٹیم مقررہ 45 اوورز میں 8 وکٹ پر 196رنز بنا سکی، فاتح سائیڈ نے 9 وکٹ پر 199رنز اسکور کیے، عمر اکمل اور محمد رضوان نے یکساں طور پر47،47رنز بنائے، سلیم مغل کے 44رنز بھی نمایاں رہے، یاسرعلی اور نعمان علی نے 3،3 وکٹیں اپنے نام کیں۔

نیشنل بینک نے زرعی ترقیاتی بینک کیخلاف 88رنز سے کامیابی حاصل کی، فاتح ٹیم نے مقررہ 45 اوورز میں 8 وکٹ پر283رنز جوڑے، فواد عالم 94 اور عمر وحید51 رنز بناکر پویلین واپس ہوئے، ان کے درمیان پانچویں وکٹ کیلیے110 کی شراکت بنی، حریف ٹیم ابتدائی 14 اوورز میں 69 پر 5 وکٹیں گنواکر مشکلات میں گھرگئی، عبدالرزاق نے ایک اینڈ پر ہمت دکھاتے ہوئے57رنز اسکور کیے تاہم پوری ٹیم 195 پر آئوٹ ہوگئی، احمد جمال اور وہاب ریاض نے 3،3 وکٹیںلیں۔ یوبی ایل نے پی آئی اے کو 7وکٹ سے قابو کرلیا، ناکام سائیڈ 39.5 اوورز میں 124رنز پر حوصلہ ہارگئی، شہریارغنی 59 اور انور علی24 رنزبنانے میں کامیاب رہے، رمیز نے تین وکٹیں لیں، یوبی ایل نے ہدف 30.4 اوورز میں تین وکٹ پر حاصل کرلیا، سعید بن ناصر44 ، احسان علی37 اورسعد سرخیل27 رنز کے ساتھ نمایاں رہے۔