افریقی ملک مالی سے 2017 میں اغوا ہونے والی نن کو رہائی مل گئی

سسٹر گلوریا سیسلیا کو 2017 میں حراست میں لیا گیا تھا، فوٹو: فائل

---

مالی میں کولمبیا سے تعلق رکھنے والی 56 سالہ نن گلوریا سیسلیا کو 4 سال بعد اغوا کاروں نے رہا کردیا۔

عالمی خبر رساں ادارے کے مطابق مالی اور برکینا فاسو کی سرحد سے 7 فروری 2017 کو اغوا ہونے والی نن کو بالآخر رہا کردیا گیا۔ گلوریا سیسلیا ایک مشنری سے منسلک تھیں اور شورش زدہ علاقوں میں امدادی کاموں میں مصروف تھیں۔

ایوان صدر کی جانب سے جاری بیان میں کہا گیا ہے کہ نن سسٹر گلوریا کی رہائی کئی انٹیلی جنس سروسز کی مشترکہ کوششوں کا نتیجہ ہے تاہم اس حوالے سے تفصیلات نہیں بتائی گئیں۔

مالی کے صدارتی محل کے ترجمان کی جانب سے کی گئی ٹوئٹ میں نن گلوریا سیسلیا کو رہائی پر مبارکباد پیش کرتے ہوئے ان کی ہمت اور بہادری پر خراج تحسین بھی پیش کیا۔

Libération ce jour 09 Octobre de la sœur religieuse Colombienne Gloria NARVAEZ. Elle avait été enlevée le 7 février 2017 à Karangasso, dans le cercle de Koutiala à la frontière entre le Mali et le Burkina Faso.
La Présidence du Mali salue le courage et la bravoure de la sœur. pic.twitter.com/xIDiIhzjMR

— Presidence Mali (@PresidenceMali) October 9, 2021

اس موقع پر سسٹر گلوریا نے کہا کہ میں مالی کے صدر اور تمام شہریوں کی شکر گزار ہوں جنھوں نے میری رہائی کے لیے کوششیں کیں اللہ انھیں برکت دے اور سلامت رکھے۔

سسٹر گلوریا سیسلیا کی ایک ساتھی نے اغوا کی روداد سناتے ہوئے بتایا اغوا کار دیگر دو نسبتاً کم عمر خاتوں راہبوں کو لے کر جارہے تھے تاہم سسٹر نے بچیوں کی جگہ خود کو اغوا کاروں کے سامنے پیش کیا تھا۔