انٹر بورڈ جعلی اسناد پر داخلہ لینے والے 46 امیدواروں کے نتائج منسوخ

طلبا نے حیدرآباد تعلیمی بورڈ سے گیارہویں کا امتحان پاس کرنے کی جعلی اسناد کے ذریعے بارہویں جماعت میں داخلہ لیا تھا۔ فوٹو: فائل

---

اعلیٰ ثانوی تعلیمی بورڈ کی انتظامیہ نے جعلی اسناد کی بنیاد پر داخلہ حاصل کرنے اور انٹرکا امتحان دینے والے 46 امیدواروں کے نتائج منسوخ کردیے ہیں۔

بورڈکے چیئرمین پروفیسرانواراحمد زئی کے مطابق حیدرآباد تعلیمی بورڈ سے گیارہویں کلاس کا امتحان پاس کرنے کی جعلی اسناد کے ذریعے ان امیدواروں نے بارہویں کلاس میں داخلہ لیاتھا،امتحان میں شریک ہونے والے امیدواروں کی اسناد کی تصدیق متعلقہ بورڈز سے کرائی جانے پر اسناد جعلی قرار پائیں،ان 46 امیدواروں کے امتحانی فارم اور نتائج کو منسوخ کردیا گیا جن 46 امیدواروں کے داخلے کالعدم قرار دیے گئے ہیں ، ان تمام طلبا کا تعلق ثانوی و اعلیٰ ثانوی تعلیمی بورڈ حیدرآباد سے ہے اور اسی بورڈ نے اپنے مراسلہ نمبر 588 اور 760 کے ذریعے اعلیٰ ثانوی تعلیمی بورڈ کراچی کو مطلع کیا ہے کہ ان تمام امیدواروں نے حیدرآباد بورڈ سے گیارہویں جماعت کا امتحان پاس نہیں کیا ،اس لیے ان کی جانب سے پیش کی جانے والی یہ اسناد جعلی ہیں،ان کیسز کا جائزہ لے کر اعلیٰ سطح کی کمیٹی نے ان کے بارہویں جماعت کے نتائج منسوخ کرنے کی سفارش کی تھی جسے اعلیٰ ثانوی تعلیمی بورڈ کے چیئرمین پروفیسر انوار احمد زئی نے منظور کرتے ہوئے ان کے نتائج کو کالعدم قرار دینے کا نوٹیفکیشن جاری کردیا۔