کالام اور کمراٹ میں پھنسے سیاحوں کی ہیلی کاپٹر کے ذریعے محفوظ مقام پر منتقلی

کالام سے ہیلی کاپٹر کے ذریعے منتقل کیے گئے افراد کو گاڑی سے لے جایا جارہا ہے (فوٹو : ایکسپریس)

---

وزیراعلی خیبر پختونخوا کی ہدایت پر کالام اور کمراٹ میں پھنسے لوگوں کو نکالنے کے لیے ہیلی کاپٹر سروس شروع کردی گئی، حکومت نے ریسکیو آپریشن کے لیے مزید دو ہیلی کاپٹر مانگ لیے۔

ایکسپریس نیوز کے مطابق بارشوں اور سیلاب کے باعث خیبر پختونخوا کے علاقہ کالام میں سیاح پھنس گئے۔ راستے بند ہونے کے باعث پھنسے سیاحوں کو نکالنے کے لیے امدادی کارروائیوں میں مشکلات کا سامنا تھا۔

یہ پڑھیں : پاک فوج نے سوات میں پھنسے 110 افراد کو ریسکیو کرلیا

وزیراعلی خیبر پختونخوا نے سیاحوں کو نکالنے کے لیے سرکاری ہیلی کاپٹر فراہم کردیا۔ ہیلی کاپٹر مقامی لوگوں کے لیے امدادی سامان لے کر کالام اور کمراٹ پہنچا اور وہاں سے سیاحوں کو نکالنے کا سلسلہ شروع کر دیا۔

کمراٹ سے 30 افراد کو شرینگل یونیورسٹی منتقل کیا گیا جب کہ کالام سے 85 افراد کو سیدو شریف ائیرپورٹ منتقل کیا گیا۔