یوم پاکستان جوش جذبے سے منایا گیا مختلف تقاریب کا انعقاد

یوم پاکستان پرگورنر سندھ عشرت العباد، وزیراعلیٰ قائم علی شاہ، صوبائی وزرا ا ور عمائدین شہر مزار قائد پر فاتحہ خوانی کررہے ہیں۔ فوٹو: ایکسپریس

---

یوم پاکستان کی74 ویں تقریبات کے موقع پر ملک بھر کی طرح کراچی میں بھی انتہائی جوش و جذبے سے منائی گئیں۔

اس سلسلے میں مختلف سیاسی و مذہبی جماعتوں اور انجمنوں کی جانب سے خصوصی تقریبات کا انعقاد کیا گیا، اخبارات اور رسائل میں 23 مارچ 1940 کو منظور کی جانیوالی قرار داد کی اہمیت اور اس سے متعلق خصوصی مضامین شایع کیے گئے، الیکٹرونک میڈیا پر بھی اس سلسلے میں خصوصی نشریات کا اہتمام کیا گیا جس میں نہ صرف قراداد لاہور کے مقاصد بیان کیے گئے بلکہ قیام پاکستان میں کلیدی کردار ادا کرنے والے قومی رہنمائوں کی جدوجہد پر بھی روشنی ڈالی گئی، گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ نے 23 مارچ یوم پاکستان کے موقع پر مزار قائد پر حاضری دی اور فاتحہ خوانی کی، اس موقع پر سینئر صوبائی وزیر نثار احمد کھوڑو، اویس مظفر ، میر ہزار خان بجارانی، علی گوہر خان مہر، شرمیلا فاروقی، گیان چند اسیرانی، متحدہ کے سید سردار احمد، رئوف صدیقی اور دیگر اعلیٰ افسران نے شرکت کی۔

فاتحہ خوانی کے بعد گورنر سندھ اور وزیراعلیٰ سندھ نے مہمانوں کی کتاب میں 23 مارچ کے حوالے سے اپنے تاثرات قلمبند کیے، اس کے بعدگورنر سندھ اور وزیراعلیٰ سندھ اور نے مزار قائد کے احاطے میں موسم بہار کے آغاز کے موقع پر شجر کاری کو فروغ دینے کے لیے ایک ایک پودا بھی لگایا، ایڈمنسٹریٹر رئوف اختر فاروقی نے بھی 23مارچ کو یوم پاکستان کے موقع پر بانی پاکستان قائد اعظم محمد علی جناح کو خراج عقیدت پیش کرنے کے لیے ان کے مزار پر حاضری دی اور شہریوں کی جانب سے پھولوں کی چادر چڑھائی اور فاتحہ خوانی کی، ایڈمنسٹریٹر کراچی نے مہمانوں کی کتاب میں اپنے تاثرات درج کرتے ہوئے کہا کہ 23مارچ کا دن اس تاریخی موقع کی یاد تازہ کرتا ہے جب قیام پاکستان کے لیے کابرین ملت نے پہلی اینٹ رکھی۔