ورلڈکپ 1996 کا کوارٹر فائنل کیوں نہیں کھیلے وسیم اکرم سوال پر چراغ پا

باقی کیا چھولے بیچنے گئے تھے کہ اگر میں نہیں کھیلا تو میچ ہارگئے،سابق کپتان (فوٹو: ٹوئٹر)

---

ورلڈکپ 1996 میں بھارت کیخلاف کوارٹر فائنل کیوں نہیں کھیلے، پرستار کے سوال پر وسیم اکرم چراغ پا ہوگئے۔

سابق کرکٹر نے صارف کے سوال کا جواب دیتے ہوئے کہا کہ '' نوجوان نسل کے بارے میں میرے پاس بہت الفاظ ہیں، کبھی افواہوں پر کان نہیں دھرنا چاہیئے، جب یہ واقعہ ہوا تب تم پیدا بھی نہیں ہوئے تھے، کوئی پاکستانی میرے بارے میں اس طرح کی بات کرے تو تکلیف دہ ہوتا ہے''۔

انھوں نے کہا کہ میں نیوزی لینڈ کیخلاف میچ میں زخمی ہوگیا تھا،سوئپ شاٹ کھیلتے ہوئے مسل پل ہوگیا، بحالی فٹنس کیلیے 6 ہفتے درکار تھے، جان بوجھ کر پہلے نہیں بتایا کہ بھارت کو اعتماد نہ ملے کہ ان کا اہم کھلاڑی دستیاب نہیں، صبح وقار یونس اور سب نے دیکھا کہ مجھے 2 درد کش انجیکشن لگائے گئے تھے۔

مزید پڑھیں: لکھ لیں! پاکستان ورلڈکپ کیلئے آئے گا لیکن بھارت وہاں نہیں جائے گا، آکاش چوپڑا

وسیم اکرم نے بتایا کہ ''میں اگر میچ کھیل لیتا تو پرفارمنس کی وجہ سے لوگوں نے تنقید کرنا تھی، باقی کیا چھولے بیچنے گئے تھے کہ اگر وسیم نہیں کھیلا تو میچ ہارگئے''۔

یاد رہے کہ سابق کپتان ٹاس سے 15 منٹ قبل انجری کی وجہ سے میچ سے دستبردار ہوگئے تھے۔