سخی حسن موٹر سائیکل چوری کرنے والے گروہ کے2کارندے گرفتار

رینجرز نے اتحاد ٹاؤن اور نارتھ ناظم آبادسے 14جبکہ پولیس نے24 گھنٹوں کے دوران85ملزمان کو گرفتار کرکے اسلحہ برآمد کرلیا فوٹو: فائل

---

تیموریہ پولیس نے سخی حسن کے قریب موبائل مارکیٹ کی پارکنگ سے موٹر سائیکل چوری کرنے والے گروہ کے 2 کارندے گرفتار کر کے 6 موٹر سائیکلیں برآمد کرلیں۔

رینجرز نے اتحاد ٹاؤن اور نارتھ ناظم آباد میں ٹارگٹڈ آپریشن کے دوران 14 ملزمان جبکہ کراچی پولیس نے گزشتہ 24 گھنٹوں کے دوران 85 ملزمان کو گرفتار کر کے اسلحہ اور منشیات برآمد کرلی،تفصیلات کے مطابق ایس ایچ او تیموریہ قلندر بخش نے سخی حسن کے قریب سرینہ موبائل مارکیٹ کی پارکنگ سے موٹر سائیکل چوری کرنے والے2ملزمان غلام حسین اور مولا بخش کو رنگے ہاتھوں گرفتار کرلیا ، پولیس کے مطابق گرفتار ملزمان کی نشاندہی پر سہراب گوٹھ کے علاقے عبداﷲ غازی گوٹھ اسکیم 33 میں ایک خالی پلاٹ پر چھپائی گئی 6 موٹر سائیکلیں برآمد کرلیں ، قلندر بخش نے بتایا کہ گرفتار ملزم مولا بخش بلوچستان کے علاقے ڈیرہ مراد جمالی کا رہائشی جبکہ غلام حسین کیفے پیالہ کے عقب میں واقع بروہی گوٹھ کا رہائشی ہے اور ملزمان نے ابتدائی تفتیش میں بتایا ہے کہ 70 سے زائد چوری و چھینی گئی موٹر سائیکلیں بلوچستان لے جا کر فروخت کی ہیں۔

انھوں نے بتایا کہ ایک ملزم موبائل مارکیٹ کی پارکنگ موٹر سائیکل کھڑی کر کے جانے والے کا تعاقب کرتا ہے جبکہ دوسرا موٹر سائیکل کھول کر فرار ہوجاتا ہے ، پولیس ملزمان سے ان کے گروہ میں شامل دیگر افراد کے بارے میں مزید تحقیق کررہی ہے ، رینجرز سندھ نے اتحاد ٹاؤن کے علاقے محمد خان کالونی میں ٹارگٹڈ آپریشن کے دوران علاقے کا محاصرہ کر کے گھر گھر تلاشی لیتے ہوئے 13 ملزمان کو گرفتار کر کے مختلف اقسام کے ہتھیار اور گولیاں برآمد کرلیں جبکہ دوسری کارروائی میں رینجرز نے نارتھ ناظم آباد میں ٹارگٹڈ آپریشن کے دوران ایک سیاسی جماعت سے تعلق رکھنے والے مبینہ ٹارگٹ کلر کو حراست میں لے کر تفتیش کے لیے نامعلوم مقام پر منتقل کر دیا، کراچی پولیس کے ترجمان کی جانب سے جاری ہونے والے اعلامیے کے مطابق پولیس نے گزشتہ 24 گھنٹوں کے دوران 107 چھاپوں 5 مقابلوں میں 3 ملزمان کو ہلاک کیا جبکہ مجموعی طور پر 85 ملزمان کو گرفتار کر کے مختلف اقسام کے 19 ہتھیار ، چرس ، ہیروئن ، شراب کی بوتلیں ، موبائل فون ، موٹر سائیکلیں اور دیگر سامان برآمد کرلیا۔