کراچی میں ’’آئیڈیاز 2022‘‘ گیارہویں ایڈیشن کی تعارفی تقریب

انٹرنیشنل سیمینار میں ملکی و بین الاقوامی ماہرین تحقیقی مقالے پیش کرینگے۔ فوٹو: ایکسپریس

---

انٹرنیشنل ڈیفنس ایگزی بیشن اینڈ سیمینار (آئیڈیاز 2022) کا گیارہواں ایڈیشن 15سے 18نومبر 2022کو کراچی ایکسپو سینٹر میں منعقد ہوگا۔

اپنی روایت کے مطابق آئیڈیاز 2022 میں متعدد بے مثال سرگرمیوں کا انعقاد کیا جائے گا جن میں جدید دفاعی ٹیکنالوجیز کا مظاہرہ، انٹرنیشنل سیمینار، آئیڈیاز کراچی شو، نیٹ ورکنگ اور بزنس ٹو بزنس ، بزنس ٹو گورنمنٹ ملاقاتوں کے ذریعے کاروبار کی توسیع کے مواقع شامل ہیں۔

آئیڈیاز 2022 عالمی دفاعی صنعت کو اپنی جدید اختراعات اور ٹیکنالوجیز دنیا کے سامنے پیش کرنے کا موقع فراہم کریگی۔ سینئر سول، تجارتی اور ملٹری وفود بڑی تعداد میں اس ایونٹ میں شرکت کریں گے۔

یہ بات وزارت دفاعی پیداوار کے ذیلی ادارے ڈیفنس ایکسپورٹ پروموشن آرگنائزیشن کے حکام نے 12نومبر 2022کو کراچی ایکسپو سینٹر میں منعقدہ آئیڈیاز2022 کی تعارفی تقریب میں ملکی و غیرملکی میڈیا کے اراکین کو بریفنگ میں بتائی، ڈائریکٹر کوآرڈینیشن، برگیڈیئر نوید اعظم چیمہ، ڈائریکٹر میڈیا کموڈور محمد طاہر، ڈائریکٹر ای پی ایس ڈپو ایئرکموڈور عبدالباسط، ڈی آئی جی ٹریفک احمد نواز چیمہ اور ایونٹ کے آرگنائزر بدر ایکسپو سلوشنز کے چیف ایگزیکٹیو زہیر نصیر نے تعارفی تقریب میں شرکت کی۔

نمائش کا افتتاح 15نومبر کو ایک پروقار تقریب میں کیا جائے گا جو 18نومبر تک جاری رہیگی۔ پہلے دو روز مندوبین، تجارتی وفود اور نیٹ ورکنگ سرگرمیوں کے لیے مختص کیے گئے ہیں۔ دیگر اہم سرگرمیوں میں دفاعی مارکیٹ میں مصنوعی ذہانت، ملٹری اسٹریٹجی اور قومی سلامتی کے نئے رجحان کے موضوع پر انٹرنیشنل سیمینار شامل ہے۔ معروف ملکی و بین الاقوامی ماہرین اس موضوع پر اپنے تحقیقی مقالے پیش کریں گے۔

سیکرٹری وزارت دفاعی پیداوار لیفٹنٹ جنرل (ر) ہمایوں عزیز سیمینار کے مہمان خصوصی ہوں گے۔آئیڈیاز 2022ء کے گیارھویں ایڈیشن کو خاص بنانے کے لیے پاکستان پوسٹل سروسز نے 20 روپے مالیت کا یادگاری ٹکٹ بھی جاری کیا ہے۔ اس موقع پر پاکستان کی دفاعی صنعت کی نئی ایجادات کا افتتاح اور نمائش بھی کی جائیگی۔

آئیڈیاز 2022ء نے بکنگ، ملکی و بین الاقوامی شرکا ومندوبین کی تعداد اور نمائش کی جگہ کے لحاظ سے پچھلے تمام ریکارڈ توڑ دیے ہیں، کراچی ایکسپو سینٹر کی پوری گنجائش کے ساتھ منعقد ہونے والے اس ایونٹ میں ترکی، چین، نارتھ امریکا، ساؤتھ امریکا، یورپ، ایشیا اور فار ایسٹ ملکوں کی کمپنیوں کا تناسب 60 فیصد جبکہ ملکی اداروں اور کمپنیوں کا تناسب 40 فیصد ہے۔

تجارتی مندوبین کے علاوہ 64 ملکوں کے 285 اعلیٰ سطح کے مندوبین بھی نمائش کا دورہ کریں گے۔اس موقع پر غیرملکی مندوبین، اہم سرکاری شخصیات اور نمائش کے شرکا کے درمیان سیکڑوں کی تعداد میں بی ٹو بی اور بی ٹو جی ملاقاتیں بھی ہوں گی۔

تعارفی تقریب میں ڈی آئی جی ٹریفک احمد نواز چیمہ نے میڈیا کو کراچی کے شہریوں کی نمائش کے دوران آمدورفت میں سہولت کے لیے مرتب کیے گئے ٹریفک کے پلان اور متبادل راستوں کے بارے میں بریفنگ دی۔کراچی کے شہریوں کے لیے 17نومبر کو ساحل سمندر پر نشان پاکستان سی ویو پر کراچی شو کا انعقاد بھی کیا جائے گا۔