یہ پینٹ چوروں کو دیوار پھلانگنے سے روک سکتا ہے

امریکی کمپنی نے گھرکی دیوارکو پھلانگنے والے چوروں کو روکنے کے لیے ایک خاص روغن بنایا ہے جو تین سال تک اپنی کارکردگری برقرار رکھتا ہے۔ فوٹو: بشکریہ کیمریکس

---

چوروں اور رہزنوں کو روکنے والا ایک ایسا پینٹ بنایا گیا ہے جو نقب زنوں اور چوروں کو گھر میں گھسنے نہیں دیتا ۔ اسے 'اینٹی کلائمبنگ پینٹ' (چڑھنے سے روکنے والا روغن) کا نام دیا گیا ہے۔

یہ پینٹ کسی بھی حالت میں خشک ںہیں ہوتا اور اپنی چپکنے اور پھسلنے کی صلاحیت برقرار رکھتا ہے۔ ایک مرتبہ روغن پھیرنے کے تین سال بعد بھی یہ پینٹ پھسلن اور چکنائی برقرار رکھتا ہے خواہ موسم گرم ہو یا سرد۔ اسی طرح بارشوں سے بھی یہ اپنی خاصیت برقرار رکھتا ہے۔

اس پینٹ کی تین ملی میٹر پرت لگا کر وہ بہت چمکدار اور گیلا دکھائی دیتا ہے۔ جس دیوار پر اسے لگایا جائے اس پر چڑھنا ناممکن ہوجاتا ہے۔ اسے روغن ساز کمپنی 'کیمریکس' نے تیار کیا ہے۔ جب بھی کوئی شخص اپنے جسم سے اس پینٹ کو رگڑتا ہے تو وہ اس کے بدن پر چپک جاتا ہے اور یوں چور آسانی سے پہچانا بھی جاسکتا ہے۔ دوسری جانب اسے لباس اور جسم سے فوری طور پر صاف کرنا بہت مشکل ہوجاتا ہے۔