میری بیٹی ایوا ہندی نہیں بول سکتی اور وہ پوری انگریز ہے، منوج باجپائی کا انکشاف

ممبئی: بالی وڈ کے نامور اداکار منوج باجپائی نے انکشاف کیا ہے کہ ان کی بیٹی ایوا اگرچہ بالی وڈ فلموں کی بڑی مداح ہے لیکن وہ ہندی نہیں بول سکتی۔ 

اداکار نے بتایا کہ ان کی بیٹی پہلی مرتبہ ان کی فلم ’باغی 2‘ کے سیٹ پر آئی اور اس نے پوچھا تھا کہ ٹائیگر شیروف کہاں ہے۔

منوج باجپائی کا کہنا تھا کہ ایوا کو ہندی نہیں آتی لیکن اس کے پسندیدہ اداکار ہندی فلموں والے ہیں اور یہ ان سے ملنے کے مواقع تلاش کرتی رہتی ہے۔

انہوں نے مزید بتایا کہ ان کی بیٹی پوری انگریز ہے، اسے ڈانٹ بھی پڑتی ہے لیکن پھر بھی وہ ہندی نہیں بولتی۔

اداکار کا کہنا تھا کہ ایوا کی ہندی ٹیچر اس سے بہت ناراض رہتی ہے اور ایک دن میٹنگ میں اس نے منوج باجپائی سے کہا کہ انہیں خوشی ہے وہ ان کی بیٹی کو پڑھاتی ہیں لیکن ایوا ہندی میں بالکل گفتگو نہیں کرتی۔

واضح رہے کہ منوج باجپائی کی نئی فلم ’صرف ایک بندہ کافی ہے‘ حال ہی میں ریلیز ہوئی اور اسے بہت اچھے ریویوز مل رہے ہیں۔