گائے رکشا کے نام پر ہندو بلوائیوں نے مسلمان نوجوان کو قتل کردیا

مہاراشٹر: ممبئی سے 220 کلومیٹر دور قصبے سنگمنر میں ایک نوجوان مسلمان کو گائے کا گوشت خریدنے پر انتہا پسند ہندوؤں نے قتل کردیا ہے۔

عالمی میڈیا رپورٹس کے مطابق 24 سالہ عفان عبدالانصاری ایک دکاندار سے 450 کلو گرام گوشت لے کر جارہے تھے جب انہیں گائے ماتا کے پجاریوں نے مار مار کر قتل کیا۔

38 سالہ محمد اصغر کو ریاست مہاراشٹر کے ضلع ناسک میں اپنی رہائش گاہ سے تقریباً 200 کلومیٹر (124 میل) دور پولیس کی طرف سے کال موصول ہوئی جس میں انہیں انکے 24 سالہ بھتیجے عفان عبد الانصاری کی موت کے بارے میں اطلاع دی گئی۔

کال کے تقریباً تین گھنٹے بعد جب اصغر جائے وقوعہ پر پہنچے تو اپنے بھتیجے کی خراب حالت میں لاش دیکھ کر انہیں یقین نہیں آیا۔

مقتول کے چچا نے میڈیا نمائندوں سے گفتگو کے دوران بتایا کہ جب میں نے اسپتال پہنچنے پر اپنے بھتیجے کی لاش دیکھی تو اس کا چہرہ ہرا تھا، اس کے ماتھے پر زخم تھے، اس کا کندھا اپنی جگہ سے ہٹا ہوا تھا اور انگلیاں ٹوٹی ہوئی تھیں۔ انہوں نے کہا کہ میں لاش کی حالت دیکھ کر منجمد ہوگیا تھا۔