ایشیاکپ؛ بھارتی ہیڈکوچ راہول ڈریوڈ کی پاک بھارت فائنل دیکھنے کی خواہش

بھارتی کرکٹ ٹیم کے ہیڈکوچ راہول ڈریوڈ نے ایشیاکپ میں روایتی حریف پاکستان اور بھارت کے درمیان فائنل دیکھنے کی خواہش کا اظہار کردیا۔

بھارتی میڈیا سے گفتگو کرتے ہوئے راول ڈریوڈ نے کہا کہ ہم ابتدائی دو میچز پاکستان اور نیپال کے خلاف کھیلیں گے، ہمیں دونوں گیمز جیتنا ہوں گے اور توقع رکھیں گے کہ پاکستان بھی ٹورنامنٹ کے فائنل کیلئے کوالیفائی کرے تاکہ ایونٹ میں تیسری مرتبہ بھی سامنا ہو۔

سابق کپتان و کوچ نے کہا کہ پاک بھارت میچز دیکھنا خوش آئند ہے مجھے توقع ہے کہ پاکستان بھی ایونٹ کے فائنل میں جگہ بنائے گا اور زبردست مقابلہ دیکھنے کو ملے گا۔

مزید پڑھیں: ایشیاکپ 2023 کے شیڈول کا اعلان ہوگیا

گزشتہ روز ایشین کرکٹ کونسل (اے سی سی) کے صدر اور بھارتی کرکٹ بورڈ (بی سی سی آئی) کے چیئرمین جے شاہ نے ایشیاکپ 2023 کے شیڈول کا اعلان کیا تھا جبکہ لاہور میں پاکستان کرکٹ بورڈ (پی سی بی) کی نئی مینجمنٹ کمیٹی کے سربراہ ذکا اشرف نے ٹرافی کی رونمائی کی تھی۔

ایشیاکپ کا آغاز 30 اگست سے ہوگا، جس میں پاکستان اور نیپال کی ٹیمیں مدمقابل آئیں گی جبکہ دوسرے میچ میں قومی ٹیم کو بھارت کا چیلنج درپیش ہوگا۔ دونوں ٹیمیں 2 ستمبر کو ٹکرائیں گی۔

مزید پڑھیں: ورلڈکپ کے آغاز سے قبل گنگولی کی پاکستانی ٹیم کیخلاف ہرزہ سرائی

پہلی بار پاکستان اور سری لنکا ایونٹ کی مشترکہ میزبانی کریں گے، ہندوستان اور پاکستان دونوں کو گروپ اے میں رکھا گیا ہے، ممکنہ طور پر ایشیاکپ کے 16 ویں ایڈیشن میں روایتی حریفوں کے درمیان 19 دنوں کے اندر تین مقابلے ہونے کی توقع ہے۔

ایشین کرکٹ کونسل اور پاکستان کرکٹ بورڈ کی جانب سے جاری کردہ شیڈول کے مطابق 50 اوورز فارمیٹ کا یہ ٹورنامنٹ 30 اگست سے 17 ستمبر تک کھیلا جائے گا۔