عمران خان سیاست میں ٹی ٹوئنٹی میچ کھیلنے کی کوشش کر رہے ہیں شرجیل میمن

عمران خان کی جانب سے 11 مئی کو چلائی جانے والی تحریک غیر ضروری ہے، شرجیل میمن فوٹو: فائل

---

سندھ کے وزیر اطلاعات و بلدیات شرجیل انعام میمن نے کہا ہے کہ عمران خان سیاست میں ٹونٹی ٹونٹی میچ کھیلنے کی کوشش کر رہے ہیں۔

کلفٹن فلائی اوور تعطل کا شکار ہونے پر افسوس ہے،عدالتیں عوامی مفاد میں رکاوٹ نہ بنیں، عمران خان کی جانب سے 11 مئی کو چلائی جانے والی تحریک غیر ضروری ہے، تحریک انصاف اب تحریک اقتدار میں بدلتی نظر آرہی ہے، کراچی کے شہریوں کو ہر ماہ 2 سے 3 نئی تفریحی سہولیات فراہم کی جائیں گی اور یہاں انٹرنیشنل طرز کے فوارے اور دیگر تفریحی سہولیات فراہم کی جائیں گی، ملکی اداروں کا احترام ہم سب پر لازم ہے سرکاری اور نجی اداروں کو اب متحدہوکر ملک کو درپیش چیلنجز کا سامنا کرنا ہوگا۔ کراچی کے شہریوں کو آئندہ ایک ماہ کے اندر یومیہ 3 سے4 لاکھ گیلن پینے کا صاف پانی ( منرل واٹر) فراہم ہونا شروع ہوجائے گا۔

عدالتیں گورننس کے معاملات میں مداخلت کی بجائے عوامی مسائل پر توجہ دیں تو بہتر ہے، بلدیاتی انتخابات کے انعقاد کی سندھ حکومت نے سب سے پہلے حمایت کی اور اپنا آئینی اختیار استعمال کرتے ہوئے قانون سازی کی تھی، آئندہ بجٹ میں سفاری پارک میں مزید سہولتوں کی فراہمی کے لئے بھی اقدامات کئے جائیں گے ۔ وہ جمعرات کو سفاری پارک میں ہاتھیوں کے نئے انکلوژر کے افتتاح کی تقریب کے بعد میڈیا سے بات چیت کررہے تھے۔ اس موقع پر صحافیوں کی جانب سے عمران خان کی جانب سے11 مئی سے احتجاجی تحریک چلانے کے سوال پرشرجیل میمن نے کہا کہ عمران خان کو تحمل کا مظاہرہ کرنا چاہیے، عمران خان ملکی سیاست میں ٹونٹی ٹونٹی میچ متعارف کرانے کی کوشش کر رہے ہیں جبکہ سیاست ٹیسٹ میچ کا نام ہے اور اس میں جلد بازی نہیں بلکہ تحمل مزاجی ضروری ہے۔

کلفٹن انڈرپاس کے حوالے سے سوال پر شرجیل میمن نے کہا کہ اس انڈر پاس اور پل کی تعمیر کا اجازت نامہ ان کی وزارت نے دیا تھا اور یہ منصوبہ پرائیویٹ سرمایہ کاری سے مکمل ہونا تھا، جس کا براہ راست فائدہ شہر کے عوام کو ہونا تھا لیکن افسوس کہ ہماری معزز عدالتوں کی جانب سے حکم امتناع نے منصوبے کو تعطل کا شکار کر دیا۔ انھوں نے کہا کہ میں نے بارہا معزز عدالتوں سے استدعا کی ہے کہ گورننس کے معاملات میں مشاورت کرلی جائے اور حکم امتناع دے کر عوامی مفاد میں کیے جانے والے کاموں میں رکاوٹ نہ ڈالی جائے۔ شہر میں جاری پانی کے بحران کے سوال پر شرجیل میمن نے کہا کہ اس وقت شہر کو50 فیصد پانی فراہم کیا جارہا ہے۔