ایمان مزاری کا اڈیالہ جیل کے باہر سے دوبارہ گرفتاری پر اسلام آباد ہائیکورٹ سے رجوع
حفاظتی ضمانت فراہم کی جائے تاکہ ضمانت قبل از گرفتاری کے لیے متعلقہ عدالت سے رجوع کرسکیں، درخواست میں مؤقف
ایمان مزاری نے اڈیالہ جیل کے باہر سے دوسری بار گرفتاری کے معاملے پر حفاظتی ضمانت کے لیے اسلام آباد ہائی کورٹ سے رجوع کرلیا۔
عدالت میں دائر درخواست میں کہا گیا ہے کہ 2 مقدمات میں ضمانت کے بعد ایمان مزاری کو تیسرے مقدمے میں گرفتار کرلیا گیا ہے۔ ایمان مزاری کو ایک کے بعد ایک مقدمے میں گرفتاری کا سامنا ہے۔
یہ خبر بھی پڑھیں: بغاوت کا کیس؛ ایمان مزاری اڈیالہ جیل سے رہائی کے بعد دوبارہ گرفتار
درخواست میں استدعا کی گئی ہے کہ ایمان مزاری کو حفاظتی ضمانت فراہم کی جائے تاکہ ضمانت قبل از گرفتاری کے لیے متعلقہ عدالت سے رجوع کرسکیں۔ ایمان مزاری مقدمات کی تفتیش میں مکمل تعاون کرنے کے لیے بھی تیار ہیں۔ عدالت ایف آئی اے اور صوبائی اداروں کو بھی ایمان مزاری کو گرفتار کرنے سے روکے۔
ایمان مزاری کی جانب سے دائر درخواست میں استدعا کی گ ئی ہے کہ عدالت ایمان مزاری کے خلاف ملک بھر میں مقدمات کی تفصیلات فراہم کرنے کا حکم دے۔ درخواست میں سیکرٹری داخلہ، آئی جی اسلام آباد، سپرنٹنڈنٹ اڈیالہ جیل، ایف آئی اے کو فریق بنایا گیا ہے۔
