ٹرافی قبضے میں کرنے کیلیے انگلینڈ کا نوجوانوں پر انحصار

وین رونی، فل جونز، الیکس اوکسلیڈ چیمبرلین اور جیک ولشیر نے انجری مسائل پر قابو پاتے ہوئے 23 رکنی اسکواڈ میں جگہ بنالی. فوٹو: فائل

---

انگلینڈ ورلڈ کپ ٹرافی قبضے میں کرنے کیلیے نوجوان پلیئرز پر انحصار کرے گا، منیجر روئے ہڈجسن کے اعلان شدہ اسکواڈ میں 8 کھلاڑی 24 سال سے کم عمر اور پہلی بار میگا ایونٹ میں جلوہ گر ہوں گے۔

قیادت کے فرائض اسٹیون جیرالڈ کو سونپے گئے ہیں،20 سالہ روس بارکلے،18 برس کے دفاعی پلیئر لیوک شائو اور 19 سالہ راہیم اسٹرلنگ کو بھی صلاحیتوں کے اظہار کا موقع ملے گا، گذشتہ میگا ایونٹ میں حصہ لینے والے محض 6پلیئرز اس مرتبہ قومی ٹیم کی نمائندگی کرپائیں گے، اس میں 35 سالہ فرینک لیمپارڈ بھی شامل ہیں، کیل واکر کو انجرڈ ہونے پر زیر غور نہیں لایا گیا، وین رونی، فل جونز، الیکس اوکسلیڈ چیمبرلین اور جیک ولشیر نے انجری مسائل پر قابو پاتے ہوئے 23 رکنی اسکواڈ میں جگہ بنالی، اسٹرائیکر رکی لیمبرٹ کو اینڈی کیرول پر ترجیح دی گئی ہے۔ دوسری جانب جاپان کے 61 سالہ اطالوی کوچ البرٹو زیکوہیرونی نے بھی23رکنی مضبوط اسکواڈ کا اعلان کردیا۔

اس میں تجربہ کار کیوسیک ہونڈا اور مانچسٹر یونائیٹڈ کے اسٹار پلیئر شنجی کاگوا بھی شامل ہیں، '' بلوسمورائی '' کی عرفیت رکھنے والی ٹیم میگا ایونٹ میں اپنا پہلا میچ 14 جون کو آئیوری کوسٹ سے کھیلے گی جس میں ڈیڈائر ڈروگبا اور یحییٰ طورے جیسے پلیئرز موجود ہیں، انھیں انگلش اور یورپیئن فٹبال لیگ کھیلنے کا وسیع تجربہ ہے، گروپ ' سی ' میں کولمبیا اور یونان بھی جاپان کے مقابل آئیں گے۔

روسی کوچ فابیو کپیلو نے 30 رکنی عبوری ورلڈ کپ اسکواڈ کا اعلان کیا ہے، اس میں رومن پاولیچنکووا اور دیمتری تراسوف کے اخراج حیران کن ہیں،کپیلو نے تجربہ کار فارورڈ پاویل پوگربیانک کو طلب کرلیا، روسی ٹیم 26 مئی کو سلواکیہ اور 31 تاریخ کو نارورے کیخلاف دوستانہ میچز کھیلے گی، وہ ورلڈ کپ کے گروپ ' ایچ ' میں بیلجیئم، جنوبی کوریا اور الجیریا کے ساتھ موجود ہے۔ دریں اثنا2013 افریقہ کپ آف نیشنز کے بعد سے الجیریا کی نمائندگی نہ کرنے والے مڈفیلڈر ریاض بودیبوز کو 30 رکنی ابتدائی اسکواڈ میں شامل کرلیا گیا۔