روم ٹینس ماریا شراپووا کو کلے سیزن میں پہلی ناکامی

روم ماسٹرز ٹینس میں ایوانووک روس کی 8 سیڈڈ پلیئر کو 6-1 اور 6-4 سے پچھاڑ کر کوارٹر فائنلز میں پہنچ گئیں۔ فوٹو: اے ایف پی/فائل

---

ماریا شراپووا کو کلے سیزن میں پہلی ناکامی کا سامنا کرنا پڑا، روم ٹینس میں اینا ایوانووک انھیں پچھاڑ کر کوارٹر فائنل میں پہنچ گئیں۔

نیوارو کو سیمونا کیخلاف واک اوور مل گیا، سارا ایرانی اور لینا نے بھی لاسٹ 8 میں جگہ بنالی، مینز سنگلز میں اینڈی مرے ، جیریمی شارڈے ، مائلوس راؤنک اور ٹومی ہاس اپنے حریفوں کا قابو کرکے کوارٹر فائنل میں جا پہنچے ۔ تفصیلات کے مطابق روسی ٹینس پلیئر ماریا شراپووا کو اینا ایوانووک کے ہاتھوں کلے سیزن میں پہلی ناکامی کا سامنا کرنا پڑگیا، روم ماسٹرز ٹینس میں ایوانووک روس کی 8 سیڈڈ پلیئر کو 6-1 اور 6-4 سے پچھاڑ کر کوارٹر فائنلز میں پہنچ گئیں، شراپووا نے مسلسل 2 مرتبہ اسٹٹ گارڈ اور میڈرڈ میں ٹائٹل پر قبضہ رکھا تھا۔

قبل ازیں عالمی نمبر ایک اور 2008 رونلڈ گیروس کی فاتح ایوانووک چار مرتبہ کی گرینڈ سلم چیمپئن کیخلاف 10 میں صرف 2میچز جیتنے میں کامیاب ہوئی تھیں۔ سربیا کی کھلاڑی کو کوارٹر فائنلز میں اسپین کی کارلا سواریز نیوارو کا چیلنج درپیش ہوگا جنھوں نے جمہوریہ چیک کی پیٹرا سیٹکووسکا کو 6-4 اور 7-6 (7/3) سے زیر کیا۔ چین کی سیکنڈ سیڈ لینا نے آسٹریلیا کی سمانتھا اسٹوسر پر 6-3 اور 6-1 سے قابو پایا، 2010 رولینڈ گیرس فائنلسٹ اسٹوسر نے 2007 سے ورلڈ نمبر 2لینا کو اپنے تمام 6 گذشتہ میچز میں شکست دی تھی۔

لینا کا کوارٹر فائنل میں اطالوی 10 سیڈ سارا ایرانی سے سامنا ہوگا ، ایرانی نے جمہوریہ چیک کی پیٹرا سیٹکووسکا کو 6-3 اور 7-6 (7/3) سے مات دی۔ مینز سنگلز میں تھرڈ سیڈ مونٹی کارلو فاتح اسٹینسلاس واورنیکا جرمنی کے 15 سیڈڈ پلیئر ٹومی ہاس کے ہاتھوں 5-7، 6-2 اور 6-3 سے ہارنے کے بعد ٹورنامنٹ سے باہر ہوگئے۔ دیگر تھرڈ راؤنڈ میچز میں 7 سیڈ برطانیہ کے اینڈی مرے نے آسٹریا کے جرگن میلزر کو 7-6 (1) اور 6-4 سے ہرایا، فرانس کے جیریمی شارڈے نے کروشیا کے ایوان ڈوڈگ کو 6-3 اور 6-2 سے واپسی کا پروانہ تھمایا،کینیڈا کے مائلوس راؤنک نے فرانس کے 11 سیڈ جوولفریڈ سونگا کو 7-6 (5) اور 6-4 سے زیر کیا۔