ایک برطانوی کمپنی نے نابینا افراد کے لیے دنیا کا پہلا " بریل " موبائل فون مارکیٹ میں متعارف کروا دیا جس کے بعد اب نابینا افراد بھی جدید ٹیکنالوجی سے استفادہ کر سکیں گے۔
برطانوی کمپنی کے مطابق اس فون کی بیرونی سطح تھری ڈی پرنٹر سے بنائی گئی ہے اور یہ فون فی الوقت صرف برطانیہ میں متعارف کیا گیا ہے جس کی قیمت 60 پاؤنڈ رکھی گئی ہے، فون کے موجد ٹام سنڈرلینڈ کا کہنا ہے کہ اس فون کی مدد سے نابینا افراد اپنے دوستوں اور خاندان کے لوگوں سے ہر وقت رابطے میں رہ سکتے ہیں جبکہ فون کی قیمت کم رکھنے کے لیے اس کی بیرونی سطح تھری ڈی پرنٹر سے پرنٹ کی گئی ہے۔
سنڈرلینڈ نے کہا کہ 'فون میں نابینا افراد کے لیے 2 سے 3 " بریل " زبان کے بٹن دیے گئے ہیں جن سے ان کا نہ صرف اپنے پیاروں سے رابطہ کرنا ممکن ہوگا بلکہ اسے وہ ہنگامی حالات میں بھی استعمال کر سکتے ہیں۔ سنڈرلینڈ نے مزید کہا کہ جو لوگ " بریل " زبان نہیں پڑھ سکتے ان کے لیے ہم نے اس فون میں ابھرے ہوئے حروف متعارف کروائے ہیں۔
