ماڈل کی خودکشی کا معاملہ بھارتی کرکٹر تفتیش کیلئے طلب

ماڈل تانیا سنگھ اپنے گھر میں مردہ حالت میں پائی گئیں : فوٹو : ویب ڈیسک

---

بھارتی پولیس نے انڈین پریمیئر لیگ (آئی پی ایل) میں سن رائزرز حیدرآباد کی نمائندگی کرنے والے کرکٹر ابھیشیک شرما کو ماڈل تانیا سنگھ کی خودکشی کے کیس میں تفتیش کے لیے طلب کرلیا۔

بھارتی میڈیا کے مطابق 19 فروری کی صبح 28 سالہ ماڈل تانیا سنگھ ریاست گجرات کے شہر سورت میں واقع اپنی رہائش گاہ پر مردہ حالت میں پائی گئیں، پولیس نے واقعے کی اطلاع ملتے ہی تحقیقات کا آغاز کردیا۔

پولیس نے ابتدائی تحقیقات میں ماڈل تانیا سنگھ اور انڈین پریمیئر لیگ (آئی پی ایل) کے کرکٹر ابھیشیک شرما کے درمیان دوستی کا انکشاف کیا ہے۔

اس حوالے سے پولیس نے بھارتی میڈیا کو بتایا کہ ہمیں ماڈل کی واٹس ایپ چیٹس موصول ہوئی ہیں جن سے معلوم ہوا ہے کہ تانیا سنگھ اور سن رائزرز حیدرآباد کے آل راؤنڈر ابھیشیک شرما کے درمیان دوستی تھی۔

پولیس کے مطابق کرکٹر ابھیشیک شرما نے تانیا سنگھ کا فون نمبر بلاک کردیا تھا اور جب ماڈل نے اُن سے سوشل میڈیا پر رابطہ کرنے کی کوشش کی تو کرکٹر نے ماڈل کے کسی بھی میسج کا جواب نہیں دیا۔

میڈیا سے گفتگو کرتے ہوئے پولیس نے کہا کہ اس واقعے کی مزید تفصیلات کرکٹر سے تفتیش کے دوران ہی معلوم ہوں گی، ہم نے تفتیش کے لیے ابھیشیک شرما کو نوٹس بھیجا ہے تاکہ وہ اس کیس میں پولیس کے سوالوں کا جواب دے سکیں کیونکہ پولیس کو شک ہے کہ ماڈل کی خودکشی کی وجہ ابھیشیک شرما ہیں۔

واضح رہے کہ 28 سالہ تانیا سنگھ پیشے سے فیشن ڈیزائنر اور ماڈل تھیں، وہ سورت میں واقع اپنی رہائش گاہ پر اپنے والدین کے ساتھ رہتی تھیں، 19 فروری کی صبح ماڈل کی پنکھے سے لٹکی ہوئی لاش سب سے پہلے اُن کے والد نے دیکھی تھی۔