پی ایس ایل9؛ ملتان میں آخری میچ، شائقین نے ہاؤس فل کردیا

حامد چوہدری  پير 26 فروری 2024
لاہور میں کراؤڈ نے خوب رونق لگائی، بابر، شاہین اور صائم ایوب توجہ کا مرکز۔ فوٹو: پی ایس ایل

لاہور میں کراؤڈ نے خوب رونق لگائی، بابر، شاہین اور صائم ایوب توجہ کا مرکز۔ فوٹو: پی ایس ایل

ملتان: ایچ بی ایل پی ایس ایل 9 کا ملتان میں آخری میچ ہاؤس فل ہوگیا۔

ملتان اسٹیڈیم میں شیڈول ایچ بی ایل پی ایس ایل9 کے میچز اختتام پذیر ہوگئے، گزشتہ روز آخری میچ ملتان سلطانز اور کوئٹہ گلیڈی ایٹرز کے مابین میچ ہوا، شائقین کو دن 12 بجے سے ہی شٹل بس سروس کے ذریعے پارکنگ ایریا سے اسٹیڈیم لانے کا سلسلہ شروع ہوگیا تھا، تمام انکلوژر مکمل طور پر بھرے رہے انتظامیہ کی جانب سے شکریہ ملتان کا بورڈ بھی لگایا گیا۔

عملے کی ملی بھگت سے مفت خوروں کی انٹری کروائی گئی، وی آئی پی انکلوژر وقار یونس اور انضمام الحق میں تعداد سے زیادہ شائقین آگئے، ٹکٹیں خرید کر آنے والے شائقین میچ کھڑے ہوکر دیکھنے پرمجبور رہے۔

یہ بھی پڑھیں: پی ایس ایل 9؛ لاہور قلندرز اپنا پانچواں میچ بھی ہار گئی، زلمی 8 رنز سے کامیاب

دونوں ٹیموں کو سخت سیکیورٹی میں اسٹیڈیم لایا گیا، وینیو کے اطراف میں بھی بڑی تعداد میں اہلکار تعینات کیے گئے اور سی سی ٹی وی کیمروں سے نگرانی بھی کی جاتی رہی، روٹ کے علاوہ اسٹیڈیم کے اطراف میں تمام روڈ ٹریفک کے لیے کھلے رہے، اسٹیڈیم کے مرکزی دروازے پر میچ دیکھنے والے شائقین کی لمبی لمبی قطاریں لگی رہیں۔

دوسری جانب قذافی اسٹیڈیم میں میزبان لاہور قلندرز اور پشاور زلمی کے میچ میں بیشتر اسٹینڈز بھر گئے۔

بابر اعظم اور صائم ایوب کراؤڈ فیورٹ رہے، شاہین شاہ آفریدی کے پرستاروں کی بڑی تعداد بھی موجود تھی،  تینوں کے حق میں نعرے بھی لگائے جاتے رہے، لاہور قلندرز کے ساتھ پشاور زلمی کی شرٹس اور پرچم بھی بڑی تعداد میں نظر آئے،سیکیورٹی ادارے اپنی ڈیوٹیز پر مستعد رہے، وی آئی پی پارکنگ میں زیادہ ہی رش دیکھنے میں آیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔