امریکا اور ایران کی عراق کو عسکریت پسندوں کے خلاف مدد کی پیشکش

عسکریت پسندوں نے موصل، صلاح الدین اور دیگر علاقوں میں کارروائیاں کرتے ہوئے وہاں کا مکمل کنٹرول حاصل کرلیا ہے۔ فوٹو: فائل

---

ISLAMABAD: امریکا اور ایران نے عراق میں عسکریت پسندوں کی بڑھتی ہوئی کارروائیوں پرقابو پانے کے لئے عراقی حکومت کو مدد کی پیشکش کی ہے۔

غیر ملکی خبر رساں ایجنسی کے مطابق ایرانی وزیر خارجہ جاوید ظریف نے عراقی شہریوں کے عسکریت پسندوں کے ہاتھوں کھلے عام قتل کی مذمت کرتے ہوئے کہا کہ ایرانی حکومت دہشت گردی کے خاتمے کے لئے پڑوسی ملک اور اس کے عوام کا ساتھ دینے کے لئے تیار ہے۔

دوسری جانب امریکا نے بھی دہشت گردی سے نمٹنے کے لئے عراقی حکومت کو مدد کی پیشکش کی ہے اور اس سلسلے میں امریکی محکمہ خارجہ کے ترجمان کا کہنا ہے کہ امریکا عسکریت پسندوں کے خلاف عراقی حکومت کا ساتھ دینے کے لئے تیار ہے اور شدت پسندوں کی جارحیت کے خلاف متفقہ حکمت عملی کی حمایت کرتا ہے۔

واضح رہے کہ دولت اسلامیہ عراق وشام نامی تنظیم کی عراق کے شمالی حصے میں کارروائیاں جاری ہیں اور ایک ہفتے کے دوران عسکریت پسندوں نے موصل، صلاح الدین اور دیگر علاقوں میں کارروائیاں کرتے ہوئے وہاں کا مکمل کنٹرول حاصل کرلیا ہے۔