تحریک انصاف کا تھری جی اور فور جی نیلامی میں غیر شفافیت کا الزام

جمہوریت پربراوقت آیاتو ن لیگ میں پورس کے ہاتھی نکلیں،شگفتہ جمانی،علی محمد کوبجٹ تقریرپرداد، خورشیدشاہ نے اضافی وقت دلوایا۔ فوٹو: اے پی پی/فائل

---

قومی اسمبلی میں تحریک انصاف نے حکومت پر تھری اورفور جی لائسنسوں کی نیلامی میں کرپشن کا الزام عائد کرتے ہوئے کہا ہے کہ مناپلی کنٹرول اتھارٹی نے غیرشفاف نیلامی کی تحقیقات کرناچاہیں تو حکومت نے اتھارٹی کوتحقیقات سے روک دیا۔

تحریک انصاف کے رکن شفقت محمود کا قومی اسمبلی کے اجلاس میں کہنا تھا کہ تھری اور فور جی کی نیلامی میں شفافیت کو نظرانداز کیا گیا، مسلم لیگ (ن) کی حکومت جب بھی برسراقتدار آئی اس نے ہمیشہ اداروں اور شخصیات سے لڑائی مول لی، نواز شریف اپنے بھائی، بچوں، بھتیجے اور دیگر رشتے داروں کو اہم حکومتی عہدے دے کر بدترین اقربا پروری کر رہے ہیں۔ دوسری جانب وزیرمملکت برائے انفارمیشن ٹیکنالوجی انوشہ رحمان نے اپوزیشن رکن کے الزام کومسترد کرتے ہوئے کہا کہ اس وقت مناپلی کنٹرول اتھارٹی نام کا کوئی ادارہ موجود ہی نہیں، مناپلی اتھارٹی 80 کی دہائی سے قبل ہی ختم ہو گئی تھی، اب مسابقتی کمیشن کام کر رہا ہے، اس کمیشن کو تھری اور فور جی لائسنسوں کی نیلامی کیخلاف کوئی شکایات موصول ہوئی نہ ہی کوئی تحقیقات روکی گئی ہیں۔

وزیر مملکت برائے ٹیکنالوجی نے تحریک انصاف کے رکن کو چیلنج کیا کہ اگر ان کے پاس مسابقتی کمیشن میں درج درخواست اور اس پرکمیشن کے جواب کی دستاویز موجود ہے تو ایوان میں پیش کریں ثبوت کے بغیر الزامات عائد نہ کریں۔ بجٹ پر بحث میں حصہ لیتے ہوئے جے یوآئی (ف) کی نعیمہ کشور نے کہا کہ حکومت جلد از جلد مردم شماری کرائے تا کہ وسائل کی تقسیم حقیقی آبادی کی بنیاد پر ہو۔پیپلز پارٹی کی شگفتہ جمانی نے کہاکہ بجٹ میں صرف پنجاب کیلیے57 ترقیاتی اسکیمیں جب کہ باقی صوبوں میں56 اسکیمیں رکھی گئی ہیں،جمہوریت پر کوئی برا وقت آیا تو مسلم لیگ (ن) کی صفوں سے شاید پورس کے ہاتھی نکلیں۔

بیلم حسنین نے کہا کہ بجٹ عوام اور غریب دشمن ہے۔ایم کیوایم کے مزمل قریشی نے کہا کہ ٹرانسپورٹرز کوبھی ٹیکس نیٹ میں لایا جائے۔ڈاکٹرنگہت شکیل نے کہاکہ کراچی کیلیے مزید منصوبے رکھے جائیں۔ سیدعلی رضاعابدی نے کہاکہ ارکان اسمبلی کو بھی ایک ایک لیپ ٹاپ دیا جائے۔جماعت اسلامی کے صاحبزادہ یعقوب خان نے کہاکہ ملازمین کی تنخواہوں میں10فیصداضافہ ناکافی ہے۔مسلم لیگ (ن) کی خالدہ منصورنے کہا کہ مضبوط وفاق اورمضبوط دفاع مسلم لیگ (ن) کامشن ہے۔

تحریک انصاف کے رکن انجینئرعلی محمدخان نے کہا کہ ہم وزیراعظم نوازشریف سے سوال کرتے ہیں کہ وہ دورہ بھارت کے دوران اپنے بیٹے حسن نوازکوکس قانون کے تحت اپنے ساتھ لے کرگئے تھے؟ہماری پارٹی کی خواہش ہے کہ حکومت اور پارلیمنٹ اپنی مدت پوری کریں اور وزیر خزانہ اسحق ڈار 2016-17کا بجٹ بھی پیش کریں۔دوران تقریرتمام سیاسی جماعتوں کے ارکان علی محمدکوداد دیتے رہے ۔بعدازاں جب ان کامائیک بند کردیاگیاتو اپوزیشن لیڈر سید خورشید شاہ نے مداخلت کرکے انھیں مزید3 منٹ کا وقت دلوادیا۔اجلاس آج صبح10بجے تک ملتوی کردیاگیا۔