سابق ایڈیشنل ڈی جی نیب کرپشن کے الزام میں گرفتار

شاہد رفیع ،اسماعیل قریشی پرگدورینٹل پاورمنصوبوںمیں بدعنوانی کاالزام ہے، مقبول لہڑی ودیگرکے خلاف بھی ریفرنس منظور۔ فوٹو: فائل

---

قومی احتساب بیورو نے سابق ایڈیشنل ڈائریکٹر نیب بلوچستان کرنل (ر) محمد اسحاق کو بدعنوانی کے الزام میںگرفتارکر لیا گیا ہے۔ڈائریکٹر جنرل نیب بلوچستان نے گرفتاری کا حکم جاری کیا تھا۔

نیب حکام نے انھیںگزشتہ روز راولپنڈی سے گرفتار کیا۔نیب سے جاری اعلامیہ کے مطابق ملزم نے بطور ایڈیشنل ڈائریکٹر نیب عہدے اور اختیارات کا غلط استعمال کیا اور لوگوں سے حکومت بلوچستان میں ملازمت دلوانے کے عوض رشوت وصول کی ۔ملزم کوآج احتساب عدالت میں پیش کرکے جسمانی ریمانڈ لیا جائیگا ۔ نمائندے کے مطابق نیب کے ایگزیٹو بورڈ کے اجلاس میںکرنل(ر) محمد اسحاق،بولان بلوچستان کے محکمہ تعلیم کے استاد سمیع اللہ کاکڑ اور دیگرافراد کیخلاف تحقیقات اوردوریفرنس دائرکرنے کی منظوری دی۔

چیئرمین نیب قمر زمان چوہدری کی صدارت میں ایگزیکٹو بورڈکے اجلاس میں بدعنوانی اور اختیارات کے ناجائز استعمال پر سابق سیکرٹری اسٹیبلشمنٹ ڈویژن و پانی وبجلی اسماعیل قریشی اور سابق سیکریٹری پانی و بجلی شاہد رفیع کیخلاف ریفرنس دائرکرنے کی منظوری دیدی ہے ۔دونوں سابق سیکریٹریز پرکابینہ کی منظوری کے بغیرگدو رینٹل پاور پلانٹ کا منصوبہ شروع کرنے کی منظوری دینے اور اختیارات کے غلط استعمال کا الزام ہے۔

انویسٹی گیشن رپورٹ کے مطابق دونوں سابق سیکریٹریز نیپیپرا قوانین اور نیپرا ایکٹ کی خلاف ورزی کرتے ہوئے منصوبے کی فزیبلٹی اسٹڈی اور حکومت پاکستان کی منظوری کے بغیر 72ملین ڈالرکا غیر قانونی ٹھیکہ دیا۔دوسرا ریفرنس مقبول احمد لہڑی، سابق چیئرمین کوئٹہ ڈیولپمنٹ اتھارٹی علی محمد بلوچ، سابق ڈائریکٹر اور دیگر ملزمان کیخلاف منظورکیا گیا۔اس مقدمے میں ملزمان نے سرکاری اراضی غیر قانونی الاٹ، پلاٹوں کی جگہ اور نمبروںکوغیر قانونی طور پر تبدیل کیا۔

نیب بورڈنے بلوچستان کے سابق صوبائی وزیر میر اسلم بزنجوکیخلاف ثبوتوں کی عدم دستیابی پر انکوائری بندکرنے کا بھی فیصلہ کیا۔اجلاس میںخیبر پختونخوا میں عوام کوجعلی سرمایہ کاری منصوبوںکے ذریعے لوٹنے کے مقدمے میں ندیم حمید شیخ اور رشید حمید شیخ کیخلاف مزید تحقیقات کا بھی حکم دیا۔ بورڈ نے پاکستان انٹرنیشنل اسکول جدہ کی سابق پرنسپل سینیٹر سحرکامران کیخلاف ایک شکایت پر نیب کے شعبہ آگاہی اور پیشگی تدارک کو اس شکایت کا جائزہ لینے کی ہدایت کی۔اس کیس میں سینیٹر سحرکامران پر اسکول فنڈز میں خورد بردکا الزام ہے۔