سری لنکا میں منعقدہ مقابلوں میں پاکستان نیول اکیڈمی کے کیڈٹس نے گولڈ میڈل حاصل کرلیا
پاکستانی ٹیم کی شاندار کامیابی پر نیول چیف ایڈمرل نوید اشرف نے فاتح کیڈٹس کو مبارکباد پیش کی
پاکستان نیول اکیڈمی کے کیڈٹس نے بین الاقوامی سیلنگ مقابلے میں شاندار کامیابی حاصل کرکے وطن کا نام روشن کردیا۔
پاکستان نیول اکیڈمی کے کیڈٹس نے سری لنکن نیول اکیڈمی میں منعقدہ سیلنگ کے مقابلے میں گولڈ میڈل حاصل کیا۔
سری لنکن نیول اکیڈمی میں منعقدہ سیلنگ کے مقابلے میں سری لنکا، پاکستان، چین اور انڈین نیول اکیڈمیز کے کیڈٹس نے حصہ لیا، مقابلے لیزر ریڈیل اور انٹرپرائز کیٹگریز میں منعقد کیے گئے۔
پاکستان نیول اکیڈمی کے کیڈٹس نے لیزر ریڈیل کیٹگری میں سلور اور انٹرپرائز کیٹگری میں گولڈ میڈل حاصل کیا، سری لنکن نیول چیف وائس ایڈمرل پرینتھا پریرا نے فاتح کیڈٹس کو میڈلز اور ٹرافی سے نوازا۔
پاکستان نیول اکیڈمی کی فاتح ٹیم آفیسر کیڈٹس سید ساخر علی شاہ، سعد بن خالد اور محمد عبداللہ اکرم پر مشتمل تھی۔
پاکستانی ٹیم کی شاندار کامیابی پر نیول چیف ایڈمرل نوید اشرف نے فاتح کیڈٹس کو مبارکباد پیش کی اور کہا کہ بین الاقوامی مقابلے میں شاندار کارکردگی پاکستان نیول اکیڈمی کی پیشہ ورانہ تربیت کا ثبوت ہے۔
