کراچی اسٹاک مارکیٹ میں کاروباری سرگرمیاں انتہائی محدود فروخت پر دباؤ برقرار

انڈیکس مزید 20 پوائنٹس کی کمی سے29477 پر بند، بیشتر کمپنیوں کی قیمتیں گرگئیں، سرمایہ کاروں کو 5 ارب 82 کروڑ کا نقصان۔ فوٹو: آن لائن/فائل

---

نئی مانیٹری پالیسی میں قرضوں کی شرح سود میں کمی بیشی سے متعلق کوئی واضح صورتحال سامنے نہ آنے، سرمایہ کاروں کے دیکھواور انتظار کرو کی پالیسی اور انتہائی محدود کاروباری سرگرمیوں کی وجہ سے کراچی اسٹاک ایکس چینج میں بدھ کو بھی محدودتیزی کے بعد مندی کا تسلسل قائم رہا۔

مندی کے سبب59.61 فیصد حصص کی قیمتیں گرگئیں جبکہ سرمایہ کاروں کے مزید5 ارب82 کروڑ1 لاکھ 9 ہزار908 ڈالر ڈوب گئے۔ ماہرین اسٹاک کا کہنا تھا کہ مارکیٹ میں رمضان المبارک کی وجہ سے خریداروں کے ساتھ فروخت کنندگان کی تعداد بھی انتہائی کم ہوگئی ہے، یہی وجہ ہے کہ ماہ رمضان المبارک کے دوران یومیہ کاروباری حجم میں مستقل کمی غالب ہوگئی ہے۔

ٹریڈنگ کے دوران غیرملکیوں، مقامی کمپنیوں اور این بی ایف سیز کی جانب سے مجموعی طور پر29 لاکھ84 ہزار839 ڈالر مالیت کی تازہ سرمایہ کاری کے نتیجے میں ایک موقع پر26.48 پوائینٹس کی تیزی سے انڈیکس کی29500 کی حد بحال ہوگئی تھی لیکن اس دوران بینکوں و مالیاتی اداروں کی جانب سے ایک لاکھ95 ہزار737 ڈالر، میوچل فنڈز کی جانب سے19 لاکھ28 ہزار870 ڈالر، انفرادی سرمایہ کاروں کی جانب سے6 لاکھ 18 ہزار48 ڈالراور دیگر آرگنائزیشنز کی جانب سے2 لاکھ42 ہزار183 ڈالر مالیت کے سرمائے کے انخلا نے تیزی کو مندی میں تبدیل کردیا۔

کاروبار کے اختتام پر کے ایس ای100 انڈیکس20.28 پوائنٹس کی کمی سے 29477.29 ہوگیا جبکہ کے ایس ای30 انڈیکس9.97 پوائنٹس کی کمی سے 20378.02 اور کے ایم آئی30 انڈیکس97.01 پوائنٹس کی کمی سے 47600.91 ہوگیا، کاروباری حجم منگل کی نسبت 35.77 فیصد کم رہا اور مجموعی طور پر3 کروڑ86 لاکھ63 ہزار410 حصص کے سودے ہوئے جبکہ کاروباری سرگرمیوں کا دائرہ کار 312 کمپنیوں کے حصص تک محدود رہا جن میں98 کے بھاؤ میں اضافہ، 186 کے دام میں کمی اور28 کی قیمتوں میں استحکام رہا۔

جن کمپنیوں کے حصص کی قیمتوں میں نمایاں اضافہ ہوا ان میں نیسلے پاکستان کے بھاؤ200 روپے بڑھ کر8050 روپے اور پاکستان سروسز کے بھاؤ 22.89 روپے بڑھ کر514.25 روپے ہوگئے جبکہ سینوفی ایونٹیز کے بھاؤ 39.56 روپے کم ہوکر815.40 روپے اورپاکستان ٹوبیکو کے بھاؤ19 روپے کم ہو کر 1180 روپے ہوگئے۔