چیمپئینز ٹرافی 2025 کے شیڈول کے حوالے سے اجلاس آج پاکستانی وقت کے مطابق 3:30 بجے شروع ہوگا۔
بھارتی میڈیا نے رپورٹس میں انکشاف کیا ہے کہ انٹرنیشنل کرکٹ کونسل (آئی سی سی) چیمپئینز ٹرافی کی میزبانی سے متعلق فیصلہ آج بورڈ میٹنگ میں کرے گا۔
ایونٹ کی میزبانی کے فرائض پاکستان کے سپرد ہیں تاہم بھارتی انکار کے بعد آئی سی سی کے پیش کردہ ہائبرڈ ماڈل کو چیئرمین پی سی بی اور حکومت نے ماننے سے صاف انکار کرتے ہوئے دوٹوک پیغام دیا ہے کہ فیصلہ برابری کی بنیاد پر ہوگا، اگر بھارت کو کسی قسم کا فائدہ پہنچایا گیا تو پاکستان آئندہ ایونٹس میں روایتی حریف کے خلاف کسی بھی میدان میں کھیلنے سے صاف انکار کردے گا۔
مزید پڑھیں: چیمپئینز ٹرافی؛ میزبانی سے متعلق فیصلہ آج ہوجائے گا
ادھر بھارتی کرکٹ بورڈ (بی سی سی آئی) اپنے اسپانسرز اور پیسے کا رعب دکھاتے ہوئے انٹرنیشنل کرکٹ کونسل (آئی سی سی) کو ہائبرڈ ماڈل پر ایونٹ کروانے کےلیے مجبور کرے گا۔
مزید پڑھیں: چمپئینز ٹرافی؛ ہم زخم سہہ لیں گے اپنی بے عزتی نہیں کرائیں گے، محسن نقوی کا آئی سی سی کو دو ٹوک جواب
پاکستان نے بورڈ میٹنگ سے قبل ہی ٹرافی کا قابل قبول فارمولا مانگا ہے اور چیئرمین پی سی بی محسن نقوی نے پاکستان کے واضح مؤقف سے آئی سی سی کو آگاہ کردیا ہے۔ محسن نقوی کا کہنا تھا کہ ہم زخم سہہ لیں گے لیکن ہم اپنی عزت پر بات نہیں آنے دیں گے، پی سی بی چیمپئینز ٹرافی کے سارے انتظامات تقریباً مکمل کرچکا ہے اور حتمی فیصلے کا انتظار ہے۔
چیمپئینز ٹرافی کے مستقبل سے متعلق فیصلہ آج 29 نومبر کو ہوگا۔
مزید پڑھیں: چیمپئینز ٹرافی؛ آئی سی سی بورڈ اجلاس میں بھارت کے بغیر بھی ٹورنامنٹ کے انعقاد پر غور ہوگا
دوسری جانب براڈ کاسٹرز کی جانب سے شیڈول کےلیے دی گئی ڈیڈلائن بھی ختم ہوچکی ہے، دونوں ممالک کے درمیان ڈیڈلاک کی وجہ سے معاملات کو بورڈ ممبرز کی ووٹنگ کے ذریعے حل کیا جاسکتا ہے۔
خیال رہے کہ اگلے 2 سال میں بھارت نے آئی سی سی کے دو بڑے ایونٹس کی میزبانی کرنی ہے، جس میں ویمنز ورلڈکپ 2025 اور مینز ٹی 20 ورلڈکپ 2026 شامل ہیں۔