پنجاب میں ماحول کی بہتری اور اسموگ کے خاتمے کے لیے کیے جانے والے اقدامات پر عوامی سروے کیا گیا جس میں پنجاب کے عوام کی نمایاں اکثریت نے وزیر اعلیٰ پنجاب مریم نواز شریف پر بھرپور اعتماد کا اظہار کیا۔
عوامی سروے کے مطابق پنجاب کی 63 فی صد عوام نے اس بات کی تائید کی ہے کہ ماضی کی حکومتوں کے مقابلے میں مریم نواز نے جامع اور مؤثر ماحول دوست اقدامات کیے ہیں مریم نواز وہ پہلی وزیراعلیٰ ہیں جنہوں نے اسموگ کے خاتمے اور ماحولیاتی بہتری کو جامع ایجنڈے کی شکل دی۔
عوامی سروے کے مطابق 40 فی صد نوجوانوں نے اپنی گاڑیوں یا موٹر سائیکلوں کے سائلنسر یا انجن ایک بار بھی چیک نہیں کرائے نہ ہی ٹھیک کروائیں جبکہ 88 فیصد عوام کا کہنا تھا کہ رہائشی علاقوں سے صنعتیں منتقل کی جائیں جبکہ 82 فی صد لوگوں نے صنعتوں اور گاڑیوں کی سخت نگرانی کی حمایت کی ہے۔
سروے کے مطابق 69 فی صد لوگوں نے اس بات کی تصدیق کی ہے کہ پنجاب حکومت کی اسموگ سے بچاؤ کی مہم سے آگاہ ہیں جبکہ 90 فیصد نوجوان اسموگ سے ہونے والی بیماریوں سے آگاہ ہیں۔
سروے کے مطابق 44 فی صد عوام نے اسموگ کے خاتمے کے لیے ایک بھی درخت نہ لگانے کا اعتراف کیا ہے جبکہ 44 فی صد نوجوان مانتے ہیں کہ گاڑیوں کا دھواں اسموگ کی وجہ بنتا ہے۔