سیئول : بی ٹی ایس کے مشہور گلوکار اور عالمی موسیقی کے آئیکون جنگ کوک نے سولو کیریئر میں ایک اور اہم سنگ میل عبور کر لیا ہے۔ جنگ کوک کے گانوں کو اسپاٹیفائی پر 7.79 ارب بار سنا گیا ہے، جس سے ان کی عالمی مقبولیت کا ایک اور ثبوت ملا ہے۔
1 ستمبر 1997 کو جنوبی کوریا میں پیدا ہونے والے جنگ کوک نے کم عمری میں بیڈمنٹن کھلاڑی بننے کا خواب دیکھا، لیکن جی ڈریگن کی پرفارمنس سے متاثر ہو کر موسیقی کی دنیا میں قدم رکھا۔
2013 میں صرف 15 سال کی عمر میں بی ٹی ایس کے کم عمر ترین رکن کے طور پر اپنے کیریئر کا آغاز کرنے والے جنگ کوک نے گروپ کی کامیابی میں اہم کردار ادا کیا۔ ان کے مشہور سولو گانے "Begin" اور "Euphoria" نے مداحوں کے دل جیتے، جبکہ انہوں نے بی ٹی ایس کے کئی گانوں کے پروڈیوسر کے طور پر بھی خدمات انجام دی ہیں۔
جنگ کوک کے سولو گانے "Seven (feat. Latto)" نے 2.08 ارب اسٹریمز حاصل کیے۔ "Standing Next to You" ایک اعشاریہ چار ارب اسٹریمز کے ساتھ دوسرے نمبر پر ہے۔ جبکہ "Left and Right" (جنگ کوک کی شراکت کے ساتھ) نے بھی 1 ارب اسٹریمز کا ہدف عبور کر لیا۔
ان کی روزانہ کی سننے والوں کی تعداد بھی لاکھوں میں ہے، اور گانے جیسے "3D (feat. Jack Harlow)" اور مختلف ریمکس ان کی موسیقی کی ورسٹیلٹی کو اجاگر کرتے ہیں۔