سابق بالی ووڈ اداکارہ ممتا کلکرنی نے کنر اکھاڑے کی مہامنڈلیشور کے عہدے سے استعفیٰ دے دیا۔ انہوں نے سوشل میڈیا پر جاری ایک ویڈیو بیان میں اس بات کا اعلان کیا۔
تقریباً پانچ منٹ کی اس ویڈیو میں ممتا کلکرنی جو اپنا روحانی نام ’مہامنڈلیشور یامائی ممتا نندگیریـ‘ رکھ چکی ہیں، نے کہا کہ وہ 25 سال کے روحانی سفر کے بعد اس عہدے پر فائز ہوئیں، لیکن ان کی تقرری پر مختلف حلقوں کی جانب سے اعتراضات اور تنازعات پیدا ہو رہے تھے۔ انہوں نے واضح کیا کہ وہ بدستور سادھوی رہیں گی۔
انہوں نے اپنے گرو، چیتنیا گگنگیری مہاراج، کو ایک ’حقیقی مہاپُرش‘ قرار دیتے ہوئے کہا کہ وہ کسی کو ان کے برابر نہیں سمجھتیں۔ ان کے مطابق آج کے دور میں لوگ انا پرستی اور باہمی تنازعات میں الجھے ہوئے ہیں۔
ممتا کلکرنی نے وضاحت کی کہ وہ آچاریہ لکشمی نرائن ترپاٹھی کا احترام کرتی ہیں، لیکن ان کی جانب سے 2 لاکھ روپے کا مطالبہ کیا گیا تھا۔ بعد میں مہامنڈلیشور جے امبا گری نے یہ رقم اپنی جیب سے ادا کی۔
یاد رہے کہ سابقہ اداکارہ کی جانب سے یہ استعفیٰ اس وقت سامنے آیا جب کنر اکھاڑے کے بانی رشی اجے داس اور آچاریہ مہامنڈلیشور لکشمی نرائن ترپاٹھی کے درمیان ممتا کلکرنی کی تقرری کے معاملے پر اختلافات پیدا ہو گئے تھے۔
یاد رہے کہ بالی ووڈ کی فلم کرن ارجن اسٹار ممتا کلکرنی ماضی کی ایک مقبول اداکارہ رہ چکی ہیں جو شہرت کی بلندیوں کو پہنچنے کے باوجود بالی ووڈ سے کنارہ کشی اختیار کر کے 25 برس پہلے اپنا روحانی سفر شروع کر چکی ہیں۔