لیبیا کے ساحل پر حادثے کا شکار ہونے والی تارکین وطن کشتی میں جاں بحق ہونے والے پاکستان کے مختلف شہروں سے عرب ممالک پہنچے تھے۔
امیگریشن ذرائع کا کہنا ہے کہ کشتی میں 63 پاکستانی اور 10 بنگلادیشی سوار تھے۔ اب تک 16 لاشیں نکالی جا چکی ہیں جو سارے پاکستانی ہیں۔
امدادی کاموں کے دوران 37 کو زندہ نکالا گیا جن میں سے 1 اسپتال میں اور 33 پولیس کی تحویل میں ہیں۔
اطلاعات کے مطابق اس حادثے میں 10 کے قریب پاکستانی اب بھی لاپتا ہیں۔ لیبیا کشتی حادثے میں جاں بحق ہونے والے پاکستانیوں کی شناخت اور سفری تفصیلات سامنے آگئیں۔
ان پاکستانی مسافروں میں سے ایک نے تافتان بارڈر سے جب کہ بقیہ چھ مسافر کراچی، کوئٹہ، پشاور، اسلام آباد اور فیصل آباد ایئر پورٹس سے الگ الگ تاریخوں میں روانہ ہوئے تھے۔
مسافر شعیب حسین 10 جنوری 2025ء کو تافتان بارڈر سے ایران گیا تھا جب کہ مسافر ثقلین حیدر 9 فروری 2024ء کو کراچی ایئر پورٹ سے سعودی عرب پہنچا تھا۔
اسی طرح عابد حسین 25 نومبر 2024ء کو کوئٹہ سے مصر، سراج الدین 31 دسمبر 2022ء کو پشاور سے سعودی عرب، سید شہزاد حسین اسلام آباد سے سعودی عرب پہنچا۔
یہ خبر پڑھیں : لیبیا کشتی حادثہ؛ ڈوبنے والے 73 میں سے 63 پاکستانی تھے، بیشتر جاں بحق ہوگئے، دفتر خارجہ
مسافر شعیب علی 19 نومبر 2024ء کو فیصل آباد سے سعودیہ عرب اور مسرت حسین نے 20 ستمبر کو 2024ء کوئٹہ سے متحدہ عرب امارات کا سفر کیا تھا۔
علاوہ ازیں جاں بحق دیگر پاکستانیوں میں نصرت حسین، شعیب علی، عابد حسین، آصف علی، مساویر حسین، اسوار حسین، انیس خان، مصیب حسین اور شاہد حسین شامل ہیں۔
یہ تمام پاکستانی مسافر کس طرح ڈوبنے والی کشتی تک پہنچے اور کہاں سے اپنے سفر کا آغاز کیا تھا اس کے بارے میں معلومات جمع کی جا رہی ہیں۔