بھارتی کامیڈین کپل شرما اور سنیل گروور کی لڑائی کسی سے پوشیدہ نہیں۔ سنیل گروور اپنے مشہور کردار ’گتھی‘ اور ’ڈاکٹر مشہور گلاٹی‘ کے باعث بے حد مقبول ہوئے، لیکن 2018 میں ایک جھگڑے کے بعد انہوں نے کپل کا شو چھوڑ دیا۔
یہ جھگڑا اس وقت ہوا جب کپل اور سنیل آسٹریلیا سے واپس آرہے تھے اور دورانِ پرواز ان کے درمیان تلخ کلامی ہوئی، جس کے بعد سنیل گروور نے شو کو ہمیشہ کے لیے چھوڑ دیا۔ تاہم، 6 سال بعد دونوں نیٹ فلکس کے "دی گریٹ انڈین کپل شو" میں دوبارہ ایک ساتھ نظر آئے۔
کئی رپورٹس میں دعویٰ کیا گیا کہ سنیل کے جانے کے بعد کپل کے شو کی مقبولیت میں کمی آئی، جس سے انہیں مالی نقصان اٹھانا پڑا۔ تاہم، شو کے ایک اہم رکن راجیو ٹھاکر نے اس دعوے کو مسترد کرتے ہوئے کہا کہ کپل اور سنیل دونوں نے ایک دوسرے کے بغیر بھی کامیابیاں سمیٹیں اور کسی کو کوئی مالی نقصان نہیں ہوا۔
راجیو ٹھاکر نے مزید کہا کہ پیسہ کسی کو بھی ساتھ کام کرنے پر مجبور کر سکتا ہے، لیکن اگر آپ سیٹ پر جائیں تو دیکھیں گے کہ کپل اور سنیل حقیقی طور پر ایک دوسرے کی کمپنی سے لطف اندوز ہو رہے ہیں۔
کپل شرما اور سنیل گروور کی یہ نئی شراکت داری مداحوں کے لیے خوشخبری ہے، کیونکہ دونوں کی جوڑی ہمیشہ ناظرین کو محظوظ کرتی رہی ہے۔ اب دیکھنا یہ ہے کہ کیا مستقبل میں یہ ساتھ برقرار رہتا ہے یا نہیں۔