پشاور:
خیبرپختونخوا میں شدید گرمی کی لہر جاری ہے جب کہ محکمہ موسمیات نے بعض مقامات پر بارش اور ژالہ باری کا امکان بھی ظاہر کیا ہے۔
محکمہ موسمیات نے پیش گوئی کی ہے کہ خیبرپختونخوا کے بیشتر میدانی اضلاع میں موسم گرم اور خشک رہنے کا امکان ہے، تاہم بعض بالائی اور قبائلی علاقوں میں آندھی، گرج چمک اور ہلکی بارش کی توقع ہے۔
چترال، دیر بالا و زیریں، سوات، ملاکنڈ، شانگلہ، کرم، اورکزئی، باجوڑ، خیبر اور شمالی وزیرستان میں موسم ابر آلود رہنے کے ساتھ چند مقامات پر گرج چمک کے ساتھ بارش ہو سکتی ہے۔
اسی طرح مانسہرہ، ایبٹ آباد، بٹگرام، تورغر، لکی مروت، ڈیرہ اسماعیل خان، بنوں، ہنگو، مردان، چارسدہ اور صوابی میں بھی چند مقامات پر بارش اور گرج چمک کا امکان ظاہر کیا گیا ہے۔
محکمہ موسمیات کے مطابق ان علاقوں میں ژالہ باری اور گرد آلود ہواؤں کے چلنے کا خدشہ بھی موجود ہے، جس کے باعث شہریوں کو احتیاط برتنے کی ہدایت دی گئی ہے۔
گزشتہ روز ریکارڈ کیے گئے درجہ حرارت کے مطابق پشاور میں پارہ 38 ڈگری سینٹی گریڈ تک جا پہنچا، جب کہ ڈیرہ اسماعیل خان میں سب سے زیادہ 40 ڈگری سینٹی گریڈ ریکارڈ کیا گیا۔
دیگر شہروں میں چترال کا درجہ حرارت 34، دیر 33، سوات (مینگورہ) 35، کالام 27 اور مالم جبہ میں سب سے کم 22 ڈگری سینٹی گریڈ ریکارڈ کیا گیا۔
محکمہ موسمیات کا کہنا ہے کہ آئندہ چند روز تک موسم میں اس قسم کی تبدیلیاں جاری رہ سکتی ہیں، اس لیے عوام خصوصاً پہاڑی اور قبائلی علاقوں میں رہنے والے افراد بارش اور ژالہ باری کے دوران غیر ضروری سفر سے گریز کریں اور احتیاطی تدابیر اختیار کریں۔
