کوئٹہ:
مرکزی رویت ہلال کمیٹی نے محرم الحرام کا چاند نظر آنے کا اعلان کردیا۔
ایکسپریس نیوز کے مطابق مرکزی رویت ہلال کمیٹی کا اجلاس مولانا عبدالخبیر آزاد کی زیر صدارت ڈپٹی کمشنر آفس کوئٹہ میں معنقد ہوا جب کہ زونل اور ضلعی رویت ہلال کمیٹیوں کے اجلاس ان کے متعلقہ ہیڈکوارٹرز میں ہوئے۔
مولانا عبدالخبیر آزاد نے اجلاس کے بعد اعلان کیا کہ ہمیں ملک کے مختلف علاقوں سے چاند نظر آنے کی شہادتیں ملی ہیں،27 جون جمعہ کو یکم محرم الحرام اور یوم عاشور 6 جولائی بروز اتوار کو ہوگا۔
عاشورہ کی تعطیلات کا اعلان
عاشورے کے موقع پر ہر سال وفاقی حکومت کی جانب سے نو اور دس محرم کو تعطیل کا اعلان کیا جاتا ہے، اس بار یہ تعطیلات 5 اور چھ جولائی بروز ہفتہ اور اتوار کو ہوں گی۔
کیبنیٹ ڈویژن کے سال 2025ء کے جاری کردہ ہالیڈے کلینڈر میں بھی عاشورہ کی تعطیلات پانچ اور چھ جولائی کو ظاہر کی گئی ہیں، وفاقی حکومت کی جانب سے جلد اس حوالے سے نوٹی فکیشن جاری کردیا جائے گا۔
سپارکو نے جمعہ کو چاند نظر آنے کی پیش گوئی کی تھی
واضح رہے کہ پاکستان کے قومی خلائی ادارے سپارکو نے محرم الحرام 1447 ہجری کے چاند سے متعلق پیش گوئی کی تھی۔
سپارکو نے کہا تھا کہ ہلال کی پیدائش 25 جون 2025ء کو سہ پہر 3 بج کر 32 منٹ پر متوقع ہے جبکہ 26 جون کو غروب آفتاب کے وقت چاند کی عمر تقریباً 28 گھنٹے اور 15 منٹ ہوگی، ملک کے ساحلی علاقوں میں غروب آفتاب اور چاند کے غروب ہونے کے درمیان وقفہ 75 منٹ ہوگا، جو چاند کی رویت کے لیے موزوں ترین حالات فراہم کرے گا۔
سپارکو نے اپنے بیان میں کہا تھا کہ فلکیاتی عوامل کے مطابق اگر 26 جون کی شام موسم صاف رہا تو چاند نظر آنے کے امکانات بہت زیادہ ہیں اس لیے یکم محرم الحرام 1447 ہجری 27 جون 2025 بروز جمعہ ہونے کا امکان ہے۔
