اسلام آ باد:
پاکستان نے امریکا کی جانب سے ایرانی سفیر کو انتہائی مطلوب افراد کی فہرست میں شامل کرنے پر کہا ہے کہ رضا امیری مقدم ہمارے لیے قابلِ احترام اور تمام سفارتی مراعات کے مستحق ہیں۔
ایکسپریس نیوز کے مطابق دفتر خارجہ کا یہ بیان ایسے وقت میں سامنے آیا ہے کہ جب امریکن ایف بی آئی کی جانب سے انتہائی مطلوب افراد کی فہرست میں ان کا نام شامل کیا گیا ہے۔
دفتر خارجہ نے کہا ہے کہ پاکستان کے لیے ایرانی سفیر باہمی تعلقات کے فروغ میں اپنے مثبت کردار کی وجہ سے وسیع پیمانے پر قابلِ احترام ہیں، وہ ایک قریبی دوست اور ہمسایہ ملک کے سفیر ہونے کے ناطے تمام سفارتی مراعات اور احترام کے مکمل طور پر مستحق ہیں۔
ترجمان دفتر خارجہ نے کہا ہے کہ ایران اور پاکستان کے درمیان برادرانہ تعلقات کو مضبوط بنانے میں ایرانی سفیر کا کردار قابلِ ستائش ہے اور دونوں ممالک کے مابین سفارتی تعلقات باہمی عزت و وقار کی بنیاد پر استوار ہیں۔
خیال رہے کہ امریکن ایف بی آئی نے اپنے اسپیشل ایجنٹ رابرٹ اے باب لیونسن کو لاپتا کیے جانے کے الزام میں انتہائی مطلوب افراد کی فہرست میں ایرانی سفیر رضا امیری مقدم کا نام شامل کیا ہے جو ماضی میں ایرانی خفیہ ادارے میں آپریشنل یونٹ کے سربراہ کے طور پر کام کرچکے ہیں۔
