معروف میوزیکل بینڈ کولڈپلے کے حالیہ ایک کانسرٹ میں معروف کمپنی کے سی ای او اور خاتون ہیومن ریسورس منیجر اتفاقیہ طور پر کیمرے کی لائیو ٹرانسمیشن میں بانہوں میں بانہیں ڈالے وائرل ہوگئے۔
ٹیکنالوجی کی دنیا میں "Astronomer" نامی کمپنی اچانک شہرت کی بلندیوں پر آ گئی ہے لیکن اس بار وجہ کوئی نئی پروڈکٹ نہیں بلکہ ایک رومانوی لمحہ تھا جو کنسرٹ میں ہزاروں مداحوں اور بعد ازاں لاکھوں انٹرنیٹ صارفین کے سامنے آ گیا۔
واقعہ کچھ یوں ہے کہ بدھ کی رات میساچوسٹس کے گیلیٹ اسٹیڈیم میں کولڈپلے کا کنسرٹ جاری تھا۔ اسی دوران مشہور "جَمبوٹرون" اسکرین پر کیمرہ ایک مرد اور عورت پر جا رکا جو بانہوں میں بانہیں ڈالے موسیقی سے لطف اندوز ہو رہے تھے۔
جیسے ہی اس جوڑے نے خود کو اس حالت میں بڑی اسکرین پر دیکھا تو گھبراہٹ میں اپنے چہروں کو چھپانے لگے۔ سی ای او کیمرے سے بچنے کی کوشش میں سیٹ کے نیچے بیٹھ گئے اور ایچ منیجر نے منہ موڑ لیا۔
اس دلچسپ صورت حال پر اسکرین پر نظر جمائے کولڈپلے کے فرنٹ مین کرس مارٹن نے فی البدیہہ کہا کہ اوہ، دیکھو ان دونوں کو! یا تو یہ چھپ کر محبت کر رہے ہیں یا پھر بہت شرمیلے ہیں۔
اُس وقت تک کسی کو اندازہ نہیں تھا کہ کرس مارٹن کا بس یہی جملہ انٹرنیٹ میں آگ لگانے کے لیے کافی ہوگا۔ ویڈیو سوشل میڈیا پر جنگل کی آگ سے بھی زیادہ تیزی سے پھیلی اور جلد ہی انٹرنیٹ پر اس جوڑی کی شناخت ہوگئی۔
یہ تھے اینڈی بائرن جو کمپنی Astronomer کے سی ای او ہیں اور ان کے ساتھ اسی کمپنی کی چیف پیپل آفیسر کرسٹن کیبوٹ تھیں جو ادارے کے ہیومن ریسورسز کی ذمہ دار بھی ہیں۔
ویڈیو وائرل ہوتے ہی میمز، لطیفے، اور طرح طرح کی تھیوریز سوشل میڈیا پر چھا گئیں۔ کوئی ان کے "آفس رومانس" پر حیران تھا، تو کوئی کولڈپلے کو "محبت کے راز فاش کرنے والا بینڈ" کہنے لگا۔
تاہم، اس لطیف لمحے کا اثر کمپنی پر بھاری پڑا۔ جمعے کی رات Astronomer نے باقاعدہ اعلان کیا کہ اینڈی بائرن کو چھٹی پر بھیج دیا گیا ہے اور اس وقت کمپنی کے شریک بانی پیٹ ڈی جوی عبوری سی ای او کی ذمہ داریاں نبھا رہے ہیں۔
کمپنی کے بورڈ کی جانب سے باضابطہ تحقیقات کا اعلان کرتے ہوئے بیان میں کہا گیا ہے کہ ہم اپنی منیجمنٹ سے توقع رکھتے ہیں کہ وہ اعلیٰ مثال قائم کریں، چاہے وہ دفتر میں ہوں یا باہر کسی عوامی مقام پر موجود ہوں۔
بیان میں انٹرنیٹ پر گردش کرنے والی ان افواہوں کی بھی تردید کی گئی ہیں جن میں کسی تیسرے فرد کی غلط شناخت اور ایک جعلی سوشل میڈیا اکاؤنٹ سے سی ای او کا من گھڑت بیان شامل ہیں۔
جوڑے نے کبھی سوچا بھی نہیں ہوگا کہ رومانس کا ایک معمولی لمحہ ایک مکمل کارپوریٹ بحران میں بدل جائے گا۔
سوشل میڈیا صارفین نے اس پر تبصرہ کیا کہ جب رومانس اتنا پبلک ہو جائے کہ جاب بھی خطرے میں پڑ جائے، تو جِس کیم دیکھ کر صرف شرمانا کافی نہیں!
