لاہور میں بائیک سوار لڑکی پر تشدد کرنے والے ملزم کو گرفتار کرلیا گیا، واقعے کی ویڈیو سوشل میڈیا پر وائرل ہوگئی۔
رپورٹ کے مطابق واقعہ چوہنگ کے علاقے میں پیش آیا جہاں لڑکی پر تشدد اور اغوا کی کوشش کی گئی۔
متاثرہ لڑکی آمنہ کی والدہ فرزانہ کی درخواست پر چوہنگ پولیس نے فوری مقدمہ درج کیا، ایف آئی آر کے مطابق آمنہ گھر سے سودا سلف لینے کے لیے موٹر سائیکل پر نکلی تو ایک نامعلوم شخص نے اسے تشدد کا نشانہ بنایا۔
ملزم نے مکے، تھپڑ مارنے کے ساتھ لڑکی کو بالوں سے پکڑ کر سڑک پر گھسیٹا۔ واقعہ کی فوٹیج بھی منظر عام پر آ گئی۔
ڈی آئی جی آپریشنز لاہور محمد فیصل کامران نے واقعہ کا نوٹس لیتے ہوئے ایس پی صدر ڈویژن رانا حسین طاہر کو ملزم کی فوری گرفتاری کے احکامات جاری کیے۔
ایس ایچ او چوہنگ انسپکٹر محمد رضا کی سربراہی میں دی گئی خصوصی ٹیم نے جدید ٹیکنالوجی کا استعمال کرتے ہوئے فرار ہونے والے ملزم کو گرفتار کرلیا ،ایس ایچ او چوہنگ انسپکٹر محمد رضا کے مطابق گرفتار ملزم کی شناخت شاہ زیب کے نام سے ہوئی ہے۔جس کو حوالات میں بند کر دیا گیا۔
ایس پی صدر ڈویژن رانا حسین طاہر کے مطابق ملزم کے خلاف مضبوط چالان مرتب کرکے قرار واقعی سزا دلوائی جائےگی۔
ڈی آئی جی آپریشنز لاہور محمد فیصل کامران نے بروقت کارروائی کرتے ہوئے ملزم کی گرفتاری پر ایس پی صدر ڈویژن رانا حسین طاہر اور ایس ایچ او چوہنگ انسپکٹر محمد رضا کو تعریفی اسناد انعام دینے کا اعلان کرتے ہوئے کہا کہ خواتین پر تشدد ،ہراساں اور نازیبا حرکات کرنے والے عناصر کسی رعایت کے مستحق نہیں ان کے خلاف سخت ایکشن لیا جا رہا ہے۔
