ٹی ایل پی کے فلسطین احتجاج کے تیسرے روز اسلام آباد اور راولپنڈی میں راستوں کی بندش میں نرمی کردی گئی۔
پشاور روڈ، مری روڈ مری چوک پر بند راستوں کو جزوی طور پر کھولنا شروع کردیا گیا، موبائل نیٹ سروس بھی بحال کردی گئی، میٹرو بس سروس تیسرے روز بھی بند ہے۔
شہر اور کینٹ میں سبزی اور پھلوں کی قیمتوں میں قدرے اضافہ دیکھا جا رہا ہے، اتوار کی چھٹی اور گزشتہ 2 روز سے راستوں کی مکمل بندش سے شہر میں خاموشی ہے، سڑکوں پر ٹریفک میں واضح کمی ہے۔
مری روڈ پر شمس آباد اور فیض آباد ٹریفک کے لیے بند ہے، مریڑ چوک جزوی اور ڈبل روڈ بھی کھول دیا گیا۔
راولپنڈی سے اسلام آباد کے لیے راستہ ڈبل روڈ ٹریفک روٹ بحال کردیا گیا، پشاور سے اسلام آباد موٹروے ایم ون ٹریفک کے لیے کھول دی گئی ہے، اسلام آباد سے لاہور موٹروے ایم ٹو بھی کھول دی گئی ہے۔
شہری سوات ایکسپریس وے ،ہزارہ موٹروے اور ہکلہ ڈی آئی خان موٹروے پر سفر کر سکتے ہیں، تمام داخلی اور خارجی راستوں سے کنٹینرز ہٹا دیے گئے ہیں۔
موٹروے پولیس نے کہا کہ سفر شروع کرنے سے پہلے موٹروے پولیس ہیلپ لائن 130/ٹریول ایڈوائزری سے معلومات حاصل کی جا سکتی ہیں۔
ترجمان کے مطابق اس کے علاوہ نیشنل ہائی ویز اینڈ موٹروے پولیس کے افیشل سوشل میڈیا اکاؤنٹ سے بھی تازہ ترین معلومات حاصل کی جا سکتی ہیں۔
سٹی ٹریفک پولیس راولپنڈی نے کہا کہ راولپنڈی کی شاہراہوں کوٹریفک کےلئے جزوی طور پر کھول دیا گیا، فیض آباد کے مقام پر ٹریفک بدستور بند ہے، مری روڈ کے تمام مقامات پر ٹریفک کی روانی جاری ہے، مال روڈ و پشاور روڈ پر بھی ٹریفک معمول کے مطابق ہے۔
ترجمان نے کہا کہ کھنا پل، کُرّی روڈ سے اسلام آباد و راولپنڈی ک ٹریفک کے لیے کھلی ہیں، جہلم روڈ، کچہری چوک، سواں پل پر بھی ٹریفک کی روانی جاری ہے، اولڈ ائیر پورٹ روڈ کے دونوں اطراف ٹریفک چل رہی ہے۔
بیان کے مطابق اڈیالہ روڈ، کلمہ چوک چکری روڈ پر بھی ٹریفک کی آمد و رفت جاری ہے، چکری انٹرچینج، فتح جنگ ٹول پلازہ، ٹھلیاں انٹرچینج ٹریفک کے لیے کھلے ہیں، چونگی نمبر 26 اور Tچوک روات بھی ٹریفک کی امدو رفت جاری ہے، راولپنڈی کی تمام تحصیلوں میں بھی ٹریفک کی امدو رفت جاری ہے۔
