وزیراعلیٰ سندھ سید مراد علی شاہ کی زیر صدارت گل پلازہ آتشزدگی متاثرین کے معاوضے کی ادائیگی سے متعلق اجلاس میں اہم فیصلے کیے گئے۔
جاں بحق افراد کے لواحقین کے لیے 85 کروڑ روپے مختص کیے گئے، فی خاندان ایک کروڑ روپے معاوضہ دینے کا فیصلہ کیا گیا، 72 میں سے 61 متاثرہ خاندانوں کو گھروں پر چیک کے ذریعے ادائیگی مکمل کرلی گئی۔
متاثرہ تاجروں کے لیے 60 کروڑ روپے مختص، فی دکاندار 5 لاکھ روپے امداد فراہم کرنے کا فیصلہ، اب تک 843 دکانداروں کو امداد فراہم کردی گئی۔
دکانوں کی تعداد 1184 سے بڑھ کر 1209 ہونے پر حتمی فہرست بنانے کی ہدایت کی گئی۔
وزیراعلیٰ سندھ نے کہا کہ تصدیقی عمل تیز کیا جائے، نادرا سے رابطہ فوری کیا جائے، مستحقین کو شفاف اور بروقت ادائیگی یقینی بنائی جائے،ایک شخص کی متعدد دکانوں کے معاملے پر واضح پالیسی بنائی جائے، ایس بی سی اے کو گل پلازہ کی ازسرنو تعمیر کا منصوبہ پیش کرنے کا حکم دیا گیا۔
وزیراعلیٰ سندھ نے کہا کہ متاثرہ خاندانوں اور تاجروں کو ہر ممکن ریلیف دیا جائے گا اور انصاف یقینی بنایا جائے گا۔
