کراچی:
حج آپریشن 2026 کا آج باقاعدہ آغاز ہو رہا ہے، جس کے تحت ملک کے دیگر بین الاقوامی ایئرپورٹس کی طرح کراچی ایئرپورٹ سے پہلی حج پرواز آج رات 3 بجے روانہ ہوگی۔
جناح انٹرنیشنل ایئرپورٹ پر عازمین حج کے لیے وزارت مذہبی امور اور ایئرپورٹ انتظامیہ کی جانب سے خصوصی انتظامات کیے گئے ہیں۔ وزارت مذہبی امور کے حکام کے مطابق اس سال کراچی ایئرپورٹ سے 31 ہزار سے زائد عازمین حج روانہ ہوں گے۔ کراچی سے عازمین حج کو گورنر سندھ نہال ہاشمی رخصت کریں گے۔
ایئرپورٹ حکام کا کہنا ہے کہ عازمین کو امیگریشن اور دیگر مراحل مکمل کرنے کے لیے رات 8 بجے سے ایئرپورٹ آنا ہوگا۔ روڈ ٹو مکہ پراجیکٹ کے تحت سعودی حکام عازمین حج کی ون ٹائم امیگریشن کراچی ایئرپورٹ پر ہی کریں گے۔
ایف آئی اے کے مطابق امیگریشن نے عازمین حج کے لیے خصوصی اقدامات مکمل کر لیے ہیں۔ ڈپٹی ڈائریکٹر امیگریشن شہزاد اکبر کا کہنا ہے کہ عملے کو عازمین حج کی سہولت کے لیے خصوصی ہدایات جاری کر دی گئی ہیں تاکہ تمام مراحل آسانی سے مکمل ہو سکیں۔
دوسری جانب لاہور میں بھی روڈ ٹو مکہ پراجیکٹ کے تحت سعودی عرب کی امیگریشن اور حج حکام پہنچ گئے ہیں، جہاں انہوں نے انتظامات کا جائزہ لیا۔ ایئرپورٹ ذرائع کے مطابق کراچی اور اسلام آباد کے بعد اب لاہور سے بھی حجاج کی امیگریشن مقامی سطح پر ہی کی جائے گی، جس کے بعد حجاج کرام سعودی عرب پہنچ کر براہ راست ٹرمینل سے باہر جا سکیں گے۔
علامہ اقبال انٹرنیشنل ایئرپورٹ لاہور پر حجاج کرام کے لیے الگ ہال قائم کیا گیا ہے، جہاں امیگریشن مکمل کرنے کے بعد تمام عازمین سیدھے جہاز پر سوار ہوں گے۔ اسی طرح کراچی اور اسلام آباد ایئرپورٹس پر بھی سعودی عرب کی امیگریشن ٹیموں نے کام شروع کر دیا ہے۔ لاہور سے عازمین حج کی پہلی پرواز کل صبح ساڑھے 10 بجے روانہ ہوگی۔
