برطانیہ کی میری ٹائم ٹریڈ آپریشنز ایجنسی نے اطلاع دی ہے کہ ایک روز قبل آبنائے ہرمز سے گزرنے والے ایک تیل بردار ٹینکر کو ڈرون حملے کا نشانہ بنایا گیا، جس کے نتیجے میں جہاز کو معمولی نقصان پہنچا تاہم کسی شخص کے زخمی یا ہلاک ہونے کی اطلاع نہیں ہے۔
خبر رساں ادارے اے ایف پی کے مطابق ایجنسی نے بتایا کہ اسے فوجی حکام کی جانب سے اطلاع موصول ہوئی کہ آبنائے ہرمز سے باہر کی جانب سفر کرنے والے ایک ٹینکر کو بغیر پائلٹ فضائی گاڑی نے نشانہ بنایا۔
برطانوی میری ٹائم ایجنسی کے مطابق حملے کے نتیجے میں ٹینکر کو معمولی نقصان پہنچا، تاہم جہاز پر موجود تمام عملہ محفوظ ہے اور ان کی موجودگی کی تصدیق کرلی گئی ہے۔
ایجنسی نے مزید بتایا کہ واقعے کے نتیجے میں سمندر یا ماحول پر کسی قسم کے منفی اثرات کی اطلاع نہیں ملی۔ اس کا مطلب ہے کہ حملے کے باوجود ٹینکر سے تیل یا کسی دوسرے مواد کے اخراج کی اطلاع سامنے نہیں آئی۔
واقعہ اس وقت پیش آیا جب ٹینکر آبنائے ہرمز سے باہر نکلنے کے لیے سفر کر رہا تھا۔ آبنائے ہرمز دنیا کی اہم ترین تجارتی اور توانائی کی گزرگاہوں میں شمار ہوتی ہے، جہاں سے روزانہ بڑی تعداد میں تجارتی اور تیل بردار جہاز گزرتے ہیں۔
آبنائے ہرمز میں حالیہ دنوں میں بحری جہازوں سے متعلق متعدد واقعات سامنے آئے ہیں، جس کے باعث عالمی سطح پر اس اہم سمندری راستے کی سکیورٹی کے حوالے سے تشویش بڑھ گئی ہے۔
ابھی تک حملے کی ذمہ داری کسی فریق کی جانب سے قبول کیے جانے کی اطلاع نہیں ہے۔ واقعے کی مزید تفصیلات اور حملے میں استعمال ہونے والے ڈرون کی نوعیت کے بارے میں بھی فوری طور پر معلومات سامنے نہیں آئیں۔
