مصر کے جنوبی سینائی علاقے میں مسافر بس حادثے کا شکار ہوگئی، جس کے نتیجے میں 22 افراد جاں بحق اور تقریباً 24 زخمی ہوگئے۔
مصری حکام کے مطابق حادثہ بدھ کے روز بحیرہ احمر کے سیاحتی مقامات دہب اور نویبع کو ملانے والی سڑک پر پیش آیا، جہاں مسافر بس اچانک الٹ گئی۔
اردن کے سرکاری ٹی وی المملکہ کے مطابق حادثے میں جاں بحق ہونے والوں میں 10 اردنی شہری بھی شامل ہیں۔ بس میں مجموعی طور پر 43 افراد سوار تھے، جن میں 22 اردنی شہری شامل تھے۔
مصری وزارت صحت نے ابتدائی طور پر 16 ہلاکتوں کی اطلاع دی تھی، تاہم بعد میں ہلاکتوں کی تعداد بڑھ کر 22 ہوگئی۔ زخمیوں کو طبی امداد کے لیے قریبی اسپتال منتقل کیا گیا، جبکہ جائے حادثہ پر 20 ایمبولینسیں بھی بھیجی گئیں۔
حادثے کی فوری وجہ معلوم نہیں ہوسکی۔ حادثے کے بعد بس مکمل طور پر الٹ گئی اور اس کا ملبہ سڑک کے کنارے بکھرا ہوا دیکھا گیا۔
مصر میں ٹریفک حادثات عام ہیں اور ماضی میں ان کی وجوہات میں تیز یا لاپرواہ ڈرائیونگ، گاڑیوں کی ناقص دیکھ بھال اور ٹریفک قوانین پر کمزور عمل درآمد کو اہم عوامل قرار دیا جاتا رہا ہے۔
