کراچی:
سہراب گوٹھ کے علاقے کوئٹہ ٹاؤن میں گاڑیوں کے معمولی تصادم کا تنازعہ سنگین صورتحال اختیار کرگیا جہاں ایک فریق نے مبینہ طور پر دوسرے فریق کی گاڑی کو آگ لگا دی۔
ذرائع اور عینی شاہدین کے مطابق تنازعہ دو قبائلی افراد شکر خان اور حیات خان کے درمیان گاڑیوں کے ٹکرانے کے بعد شروع ہوا جس کے حل کے لیے دونوں فریقین کے سامنے جرگہ بھی منعقد کیا گیا۔
جرگے کے فیصلے کے مطابق شکر خان کی گاڑی حاجی حیات خان کے سامنے لائی گئی۔ بتایا جاتا ہے کہ گاڑی حاجی حیات خان کے بیٹے کو ٹکر لگنے کے معاملے میں پیش کی گئی تھی۔
حاجی حیات خان کے مطابق گاڑی صرف لوگوں کے سامنے دیکھنے کے لیے منگوائی گئی تھی اور اسے بعد میں واپس کردیا جانا تھا تاہم الزام ہے کہ گاڑی واپس کرنے کے بجائے اسے آگ لگا دی گئی۔
واقعے پر متاثرہ فریق نے شدید تشویش اور مذمت کا اظہار کیا ہے۔ عینی شاہدین کے مطابق متاثرہ شخص کی جانب سے تاحال واقعے کے حوالے سے کوئی قانونی کارروائی نہیں کی گئی۔
