انگلینڈ کے خلاف تیسرے ٹیسٹ سے قبل پاکستان کے فاسٹ بولنگ کوچ ایشلے نوفکے نے کہا ہے کہ سیریز کے دوران کھلاڑیوں کا تبدیل ہونا حوصلہ افزا نہیں، تاہم ٹیم کی تمام توجہ کھیل پر مرکوز ہے۔
ایجبسٹن میں پریس کانفرنس کرتے ہوئے ایشلے نوفکے نے بتایا کہ انہیں پی سی بی کی جانب سے رات 3 بج کر 15 منٹ پر پیغام ملا کہ وہ انگلینڈ کے خلاف ٹیسٹ میچ کے لیے روانہ ہو رہے ہیں۔
ان کا کہنا تھا کہ ایجبسٹن کی پچ پر اس وقت گھاس موجود ہے، تاہم یہ کہنا قبل از وقت ہوگا کہ ٹیسٹ میچ کے دوران بھی پچ پر اسی طرح گھاس رکھی جائے گی۔ ٹیم کمبی نیشن کے حوالے سے بھی انہوں نے کہا کہ ٹاس سے قبل حتمی بات کرنا قبل از وقت ہوگا۔
پاکستان بھیجے گئے کھلاڑیوں سے کرکٹ کے علاوہ کسی معاملے میں تحقیقات کے سوال پر ایشلے نوفکے نے کہا کہ انہیں اس بارے میں کوئی خاص معلومات نہیں اور انہیں یہ بات صحافی سے ہی معلوم ہوئی ہے۔ انہوں نے امید ظاہر کی کہ ایسا کچھ نہیں ہوگا جیسا سوال میں پوچھا گیا ہے۔
