اسلام آباد:
جماعت اسلامی اور حکومت کے درمیان پٹرولیم لیوی میں کمی کے لیے مذاکرات ہوئے، حکومت نے مزید تین روز کی مہلت طلب کرتے ہوئے دھرنا موخر کرنے کی درخواست کی جسے جماعت اسلامی نے مسترد کردیا۔
ایکسپریس نیوز کے مطابق نائب امیر جماعت اسلامی پاکستان لیاقت بلوچ کی قیادت میں جماعت اسلامی کا وفد حکومتی ٹیم سے مذاکرات کےلیے پہنچا، جماعت اسلامی کے وفد میں سید فراست شاہ، نصراللہ رندھاوا، عنایت اللہ خان، ضیاءالدین انصاری ایڈووکیٹ اور نوید علی بیگ شامل تھے۔
حکومتی مذاکراتی ٹیم کی قیادت وفاقی وزیر منصوبہ بندی احسن اقبال نے کی، ان کے ساتھ رانا ثناءاللہ خان، علی پرویز ملک اور بلال اظہر کیانی شامل تھے۔
یہ مذاکرات کا دوسرا مرحلہ تھا، پہلے مرحلے میں جماعت اسلامی نے پیٹرولیم مصنوعات کی قیمتوں میں کمی کے حوالے سے چھ تجاویز حکومتی ٹیم کو پیش کی تھیں۔
حکومتی ٹیم نے جماعت اسلامی سے ان کی تجاویز پر غور کے لیے مزید تین روز کی مہلت مانگ لی۔
ذرائع کے مطابق حکومتی ٹیم نے جماعت اسلامی سے دھرنا موخر کرنے کی بھی درخواست کی تاہم جماعت اسلامی نے اسے مسترد کردیا۔ نائب امیر جماعت اسلامی لیاقت بلوچ نے کہا کہ لانگ مارچ سے متعلق حتمی فیصلہ امیر جماعت اسلامی ہی کریں گے۔
